Vawiin khan PHE Minister Pu S Hiato hovin PHE Review meeting neih a ni a, he hun hi Pu R.L Rinawma, IRS, Commissioner PHE pawhin a hmanpui.
Pu S. Hiato chuan Department a thawk zawng zawng ten hna tha taka an thawh avangin lawmthu a sawi a. Tui tel lova mi te ber leh mi lian ber kan awm theih loh avangin kan hna hi a pawimawh em em a ni a ti. Chuvangin Department hotu lian ber atangin kan tuisemtute thlengin mawhphurhna lian tak kan nei tih hria in mipui rawng i bawl ang u tiin a fuih.
Pu R.L. Rinawma, IRS pawhin thusawiin PHE Department hi tuisem department angin hriat a ni a. Amaherawhchu Public Health Engineering Department anih angin Drainage mumal tak leh Sewerage mumal tak te hi kan hna hmabak a ni a. Hei hian Public Health nasa takin a khawih a ni, a ti a. Chuvangin perspective plan kum 2 atan, kum 5 atan, kum 10 atan etc. mumal tak kan siam a tul a ni, a ti. Exposure Tour te hi neih fo a tha, ramdang ten engtiangin nge hma an lak tih te kan zir chian fo a tul a ti bawk.
Chairman in Key note address a pe a, PHE Department kalphung te leh a hnathawh mek te hnathawh tur inchhawp te a sawi a. Heng hnathawh tur tam tak hi thawktu indaih loh nasa avangin tun dinhmunah tak hian post 147 hnawhkhah loh a awm mek a. Chuvangin tha tawk a thawh theih loh a hlauh thu sawiin, heng hna te tha taka thawh a nih theih nan a bik takin Assistant Engineer/Sub-Divisional Officer post 17 leh Junior Engineer post 29 hnawhkhah loh te hi hnawhkhah sak thuai se tih a sawi.
Mizoram ah hian khawpui (Urban) 23 a awm a, thingtlang (rural) khua 777 a awm a ni. Tun dinhmun ah Rural Water Supply ah chuan khua 589 hi fully covered (FC0 (chumi awmzia chu mi pakhatin nitin tui 40 lits dawng thei a ni) khaw 188 hi partially covered (hei hi 40 lits nitin mi pakhat in dawn tlin lohna). Khawtlang thianghlimna Sanitation lamah pawh Total Sanitation Campaign (TSC) hnuaiah Mizoram thingtlang khua a BPL tan ek in 59679 an siam sak tawh a, APL tan ek in 16861 an siam tawh bawk a, Community Sanitary Complex 519 siam a ni a, School toilet 3219 siam a ni. Agarwadi tan 912 siam a ni bawk. Standalone (Water filter) hi school hrang hrangah 1083 bun tawh a ni bawk. Kumin 2011-2012 chhung hian thingtlang ah 125 schemes thawh tum a ni. Thingtlang khaw lian deuh Phuaibuang, Bilkhawthlir, Lungzarhtum, Sangau ah te pawh hna an thawk mek bawk a ni. Urban Water Supply ah chuan Saiha, Lawngtlai, Tlabung, Saitual, Serchhip leh Lunglei ah te tui lak hna thawk mek bawk a ni.
Heng an hma chhawp mekah leh scheme enkawl mek ah te hian taima tak leh rinawm takin hna thawk tura infuihna neih a ni. Chawhnu lamah ah thupui hrang hrang zir hona te leh hmalak mek thlir hona te neih a ni a, naktukah chhunzawm leh a ni ang
