2729/2025-2026

Dated Aizawl, 19^th December 2025: Vawiin khan hunpui lo thleng tur atana inbuatsaihna ni pahfawmin, Public Health Engineering Department changtu Minister Prof. Lalnilawma hovin Aizawl khawpui tui dinhmun thlir hona, Minister Chamber-ah neih a ni a; PHE Secretary Pi Zodingpuii; Engineer-in-Chief Pi Zodinthari leh hotu dangte bakah Division hrang hranga hotute he hunah hian an tel a ni.

Minister Prof. Lalnilawma chuan krismas leh kum thar lo thleng turah mipuite’n tui lamah harsatna an tawh lohna turin PHE department chuan theih tawp an chhuah thu a sawi a. Tun dinhmunah Aizawl khawpui hmar lam kohhran hrang hrang 208-ah leh chhim lam kohhran hrang hrang 138-ah Krismas tui pek an nih tawh thu sawiin, ‘hunpui lo thleng tur atan PHE department lam chu kan in-ready reng tawh a ni’ a ti a; rokhawlhna lian tham a thlengte a nih loh chuan mipuite’n tui hniang hnar tak an neih tur thu sawiin, hlim tak leh thlamuang taka krismas leh kum thar hmang theuh turin mipuite duhsakna a hlan a ni.

Vawiina tui dinhmun sawi honaah hian Er. Lalrinzuala Ralte, SE (AWC) hnen atangin Aizawl khawpui tui dinhmun report ngaihthlak a ni a; Division hrang hrang changtu – Er. Samuel L.R. Ralte, Sr. EE (AWDD-N); Er. Lalzuimawii, Sr. EE (AWDD-S); Er. K. Lalrintluanag, Sr. EE (AWTD – Phase I, II) leh Er. C. Zothantluanga (AWTD – Phase III) te hnen atangin division hrang hranga hmalakna report-te ngaihthlak a ni bawk a; PHE department-in tun dinhmuna harsatna hrang hrang a tawn zingah, Tui put (leak) enkawlzuina tur sum (maintenance fund) leh thawktu (manpower) indaih lohnate chu harsatna langsar zualte an ni.

AIZAWL TUI DINHMUN

• Tunah hian Aizawl khawpui-ah tui connection 85,792 a awm mek a. Tui connection hi thla 1-ah 200 atanga 250 in a pun belh zel ang a ni a. Ni tin consumer 8000 atanga 11000 tui pek thin a ni a, Chawhrualin mi pakhatin ni tin tui litre 68 atanga 70 dawng ang kan ni.
• Aizawl tui sem hna hi Division pahnih - Aizawl Water Distribution Division North leh Aizawl Water Distribution Division South ten Aizawl hmar lam leh Aizawl chhim lam an enkawl mek.
• AWDD North hian tui connection 50,159 an enkawl a, AWDD South lam hian tui connection 35,633 an enkawl bawk.
• Ni tina Aizawl-in tui a mamawh zat hi litre maktaduai 35 to 40 a ni.
• Aizawl chawm tur hian AWT Division enkawl pahnih Greater Aizawl Water Supply Scheme Phase-I in ni khatah tui litre maktaduai 9 a pump chhuak thin a, Greater Aizawl Water Supply Scheme Phase-II in ni khatah tui litre maktaduai 19 a pump chhuak thin bawk a. Tun hnai (7th November 2025) atang khan AWSS Phase-III (37 MLD) Zohnuai, Vaivakawna pipeline chhia chu siam that niin ni tin tui litre maktaduai 9 pump chhuah thin a ni bawk. 
• Aizawl khawpui tan heng scheme pathum atanga ni tin a tui pump chhuah thin zat chu litre maktaduai 37 a ni a.
• AWDD N hnuaiah hian veng tam zawkah thla khatah tui vawi 3 sem thin a ni a. Veng thenkhat Section 6 huam chhung ami - Durtlang, Zemabawk, Thuampui, Chaltlang, Falkland, Zuangtui, Ainawn veng, Bawngkawnah te hian thla khatah tui vawi 2 sem chhuah hman a ni. 
• AWDD S hnuaiah hian thla khatah tui vawi thum sem theih deuh vek a ni a, sem theih lohna veng tlemte a awm a ni.
• Tui leak leh bo thlau turte ven himna tura siam Tui Leak Reporter Apps pawh tangkai taka hman zel niin vawiin thlengin report 404 dawn tawh a ni a, chin fel mek zel a ni bawk.