2434/2026-2027

Dated Aizawl, the 30th September, 2026: Vawiin khan PHE Department enkawltu Minister Prof. Lalnilawma hovin a office ah PHE Department hmalakna kal mek leh an thlen chin sawi hona an nei a. Aizawl khawpui tana Tlawng lui tui pump chhuah dan te, harsatna hrang hrang an tawh dan te leh Aizawl khawpui veng hrang hrang tui sem dan te, tui harsatna sut kian theih dan turte ngaihtuahin an sawi ho a ni.

Prof. Lalnilawma chuan tun dinhmunah PHE Dept a Engineer te leh thawktute nen an thawhhona a ṭha hle a; thawktute inpekna a ropui a, team work ṭha tak an nei chu lawmawm a tih thu a sawi.

Mipuiten tui thianghlim supply ṭha an dawn theih nan PHE Dept hian theihtawp a chhuah a, PHE Dept hi Mipui tana thawk kan nih angin, Minister tiamin tumah kan inthlahdah a thiang lo, PHE Minister chuan a ti a. Ruah a surin Aizawl khawpui chawmtu Tlawng lui hi nasa takin a nu ṭhin a, hei hian Aizawl khawpui a tui sem a ti khaihlak a, tui kan harsat phah ṭhin tih sawiin “Department hi Mipui tana thawk kan nih angin, mipui kan ngaihpawimawh a ṭul. Tui pump kawngah ani emaw tui sem kawngah a ni emaw mipui nghawng tur thil harsatna kan neih in, mipui te kan hrilh hriat vat zel hi kan mawhphurhna a ni”, a ti.

Prof. Lalnilawma chuan PHE Department in hna kan thawh in, mipui tan harsatna thlen tlem thei ang a ruahmanna kan siam thiam a ṭul a, kan hnathawh in mipui tan remchan lohna a thlen dawn a nih pawhin, mipui hnenah information mumal, rang tak pe ṭhin ila, hetiang kawngah hian khawtlang hruaitute leh NGOs te nen thawh hona ṭha kan siam thiam a ṭul hle a ni, a ti. Section tinah emaw, veng tinah kan tui sem theih hun tur information mumal tak kan pek a ṭul a, chutiang bawkin tui sem kawngah harsatna kan nei a nih pawhin, kan harsatna te a rang lamin mipui ah information kan pek vat zel a pawimawh a ni, a ti bawk.