April ni 29, 2014 (Thawhlehni) khan Lungsen Group YMA Conference vawi 26-na Lunglen Hmar Veng Hall-a neihah PHE Minister Pu Zodintluanga chu Khuallian chan changin inkhawmpui a hmanpui a ni. Lungsen Group YMA Conference hi ni hnih April 28 & 29 chhung hman a ni a, Khuallian Pu Zodintluanga chuan a kharna inkhawm nizana hmanah a tel a ni.

Nizana vantlang inkhawm palai thlahna ni bawk Lungsen ‘N’ Branch YMA President Pu P.Thangrema kaihhruaiah Khuallian Pu Zodintluanga chuan YMA huamchhungah hian Zofa zawng zawngte kan leng vek a, thalai nun kaihruaitu ber a ni bawk a, tanpui ngai apiangte tanpui thin a nih hian YMA chu pawl ropui-ah a siam a ni, a ti. Ram leh hnam hmasawnna atan YMA chuan hna tam tak a thawk a, khawtlang hmasawnna hrang hrangah theihtawp chhuahin ruihlo laka Mizo thalaite an fihlim theih nan nasa takin hma a la mek zel chu a fakawm tak zet a ni, a ti a. Tunlai khawvel-a thang chak tak social media lakah leh a hmandanah fimkhur turin thalai kalkhawmte a chah a, social media hrang hrang kaltlanga thuthang dik lo an thehdar thinte chu finfiah hnuah chauh awih turin a hrilh bawk a ni. Khuallian chuan Lungsen Group YMA tanpui nan Cheng 50,000/- a hlan a ni.

Lungsen Group YMA hi kum 1984 khan din tan niin kumin hi a din kum 40-na a ni a, a hnuaiah hian YMA Branch 16 an awm, chungte chu - Lungsen North, Lungsen South, Lungsen Venglai, Tlabung, Zodin, Chawnpui, Chawilung, Tuichawng, Chhumkhum, Rangte, Rotlang ‘W’, Phairuangkai, Belthei, Putlungasih, Kauchhuah leh Runtlung Branch te an ni.