Vawiin khan Public Health Engineering Department(PHED) hotute chuan E-in-C PHED Office-ah Er. Lalmuanzova, E-in-C, PHED hovin ruahsur nasat vanga leimin leh tuilian in tui in tur lak kawnga harsat a siam te an chinfel mek a nih dan an thlir hova. Aizawl khawpui leh Mizoram hmun hrang hrangah tuithianghlim in tur mumal taka sem a ni leh thuai theih nan chak zawka hmalak dan tur an rel.
PHED chuan tuisem khaihlakna hmunah te theihtawp chhuahin chhun leh zan zawmin hna an thawk mek zel tih tarlangin tui lakna leh tui pump chhiat avanga tui harsatna chungchangah mipui te hriattiam na an dil a. Tui harsatna alo ziaawm theih nan van ruahtui a tam thei ang ber khawl theuh turin chhungkaawtin te an ngen a ni.
"Tuilianin nasa taka kan tui lakna leh pump khawl te a tihchhiat avangin Aizawl khawpui tuisem hi kar thum (3) chhung mumal takin tih theih ani ta lova, mipui te hriatthiamna Public Health Engineering Department chuan a ngen tak meuhva, khua in a zir chuan karleh lamah te hian chuan mumal zawka tui sem theih a beiseiawm" tih PHED hotute chuan an tarlang. Aizawl Khawpui tui lakna baka District Headquarters leh thingtlanga tui lakna te pawh a chhe nasa hle tih tarlangin tuilakna chhe nasa zual siamthat leh nan a tul angin Estimate te pawh siam a nih tawh thu an sawi a. Estimate hi Disaster Management & Rehabilitation (DM&R) Department ah thawn tawh niin sanction nghak mek a ni.
PHED Officials' Meeting-ah hian Aizawl khawpuia tuisem chungchanga hmalakna hetiang hian a tarlan a ni:
1) Greater Aizawl Water Supply Scheme Phase – I
Tlawnglui hipna V.T. Pump chirhdiakina a tihbuai hi siam mek a ni a, desilting (chirhdiak paih) pawh thawhzawh thawkhat ani tawh a, Raw Water Pump khawl te nen pump theih thuai beisei a ni.
Tun dinhmun ah chuan Alternative Source - Vaipuanpho tui Gravity a lakin Tuikhuahtlang-ah tui pump chhoh reng a ni. Ruah a sur tam chauhin tui pump khawl pahnih (2) a pump theih a ni a,vawiin ah hian single (pump pakhat) chauh hmanga tui pump ani a, mahse Aizawl Water Supply Phase-II a Raw Water Pump pakhat (1) nen tangkawpin tui pump khawl pahnih (2) a tui pump mek ani.
2) Greater Aizawl Water Supply Scheme Phase – II
Tlawnglui hipna Raw -I pump chirhdiakina a tihbuai hi kar thum (3) vel lai a ni ta a, theih ang ang a siam niin Double a pump theih a ni ta a, ni hnih (2) vel a function hnuah Raw Water Pump No. II khawl a la buai avangin vawiinah chuan tui kan la pump thei lova, siam mek a ni a, siam zawh thuai beisei a ni.
Alternative source - Serlui 'A' tui Gravity a lak leiminin a tihchhiat pawh, a hmunah JCB in leivung paih hna a thawk zo tawh a, welding machine phur luh mek a ni a, tunkar chhung hi chuan pipe welding tur hi zawh hman beisei a ni.
