Vawiin chawhma khan PHED Minister Pu Zodintluanga chuan Lunglei District-a PHE Department Officer-te chu Lunglei Circuit House-ah District tui in tur dinhmun sawipuiin, tunhnaia chhiatna thleng avanga hma lak dan turte an sawiho.

He meeting-ah hian Greater Lunglei Water Supply Scheme tichangtlung turin New Economic Development Policy (NEDP) hnuaia common header thlak hna chu kalpui mek a nih thu tarlan a ni a. He hna hi zawh fel a nih hunah chuan tui pump khawl pahnih hmanga Lunglei khawpui hnianghnar zawka chawm a nih tur thu tarlan a ni. Tunhnaia leimin leh tuilian in Lunglei District khaw hrang hranga tui pekna a tihchhiat dan te sawiho a ni a. Minister chuan mahni bial chhung theuha chhiatna report te chu thuneitu sang zawkah a rang lama thehluh nise a ti a, rampum dinhmun zirchianga hma lak dan tur rel that a nih tur thu a sawi a ni.

Heng bakah hian Pu Zodintluanga chuan department officer-te chu tuisem kawngah fimkhur turin a chah a. Mipuite a tuartu an nih angin, Department pawh a hmingchhia a ti a. Hna thawk leh awm tha duhlo te chu dan hmangin, a tul anga an chunga hma la turin a hriattir a ni.