1519/2026-2027

Aizawl, 24 July 2026: Vawiin chawhnu khan Swachh Bharat Mission (Grameen), Public Health Engineering Department (PHED) buatsaihin Project Management Unit (PMU), PHED Office Kawtzawl, MINECO, Khatla-ah Bawlhhlawh khawnkhawmna tur motor (Solid Waste Collection Vehicle) semchhuahna hun hman a ni a. He hun hi PHED Minister Prof.Lalnilawma’n khuallian niin a hmanpui.

Khuallian Prof. Lalnilawma chuan thu sawiin vawiina Bawlhhlawh khawnkhawmna tur lirthei semchhuahte chu faina kawnga Mizoram hmalakna pawimawh tak a ni, a ti a. Mizote chu faina kawngah hma sawn viau tawh mah ila, zir tur kan la ngah thu sawiin Minister chuan, "Kan thawmhnawte a fai a, a langah chuan kan changkangin kan fai viau tawh a, a lang lo lamah erawh kan la fai tawk lo hle. A langa kan fai ang hian a lang lo lam, kan chhehvelte pawh fai se chuan kan lui tui nute pawh a zia deuh ang a, lui dunga plastic bottle leh polythene len thla tam lutuk te pawh hi a ziaawm deuh dawn a ni," a ti.

Minister chuan sawrkarin faina lam hawi Infrastructure a bun (set up) te chu mipui ta a nih angin, a enkawl zui hna pawh khawtlangin an mawhphurhnaa an lak a ngai a ni, a ti a. Hengte hi a hlawhtlin theih nan mawhphurhna tam zawk hi Village Water & Sanitation Committee (VWSC) te kutah a awm tur thu a sawi. Bawlhhlawh phurhna motor te chu a thlawna pek an nih thu sawiin, hengte hi ṭangkai taka hmangin a enkawl zui leh vawn ṭhatna tur (maintenance fund) chu khawtlangin an lo insiam chawp (generate) a ngai a, sawrkar leh mipui kan thawkho zel dawn a ni, a ti bawk.

Nikuma thingtlang khua hmasawnna tur, LAD hmalakna  hnuaia Sustainable Development Goals (SDGs) tehna hrang hrang zinga pakhat ‘Clean and Green Village’ ah Kawrthah North chuan India ram pumpuiah pakhatna dinhmun hauhin lawmman cheng vaibelchhe khat (Rs.1 Crore)an dawng a. All India-ah pawh pakhatna hial kan nih theih chuan, khaw dangte pawhin ṭhahnemngai a hma kan lak ve chuan kan ti ve thei a ni, a ti a. Public Health Engineering Department (PHED) hnuaiah pawh theihtawp chhuah a, faina leh tui thianghlim in tur ngaihtuahna kawngah theihtawp chhuah turin a fuih bawk a ni.

Khuallian chuan SBM-G hnuaia bawlhhlawh sawngbawlna kalpui mek a hman tur motor pasarih (7) chu a vailiam nghal a. Motor hi RD Block pahnih huamtu Aibawk Plastic Waste Management Unit, RD Block pathum huamtu Seling PWMU, RD Block pathum huamtu Serchhip SWMC leh RD Block pakhat huamtu Kawlkulh PWMU-te hman tura tih a ni.

Tun dinhmunah PHE Department enkawl SBM-G, Mizoram hnuaiah hian hmun panga-ah bawlhhlawh sawngbawlna hi mumal taka kalpui mek a ni a, chungte chu Aibawk PWMU, Seling PWMU, Serchhip SWMC, Kawlkulh PWMU leh Thaizawl PWMU te an ni. Heng sawngbawlna hmun hian a vaiin khua 87 a huam mek a, khaw tam zawk huam tura hmalak mek a ni.

Heng bawlhhlawh sawngbawlna hmunte hi private operator-te leh Village Water & Sanitation Committee (VWSC) te enkawlna hnuaiah mipuite aṭanga user fee tling khawm hmanga enkawl mek a ni a, mipuite lam atanga user fee hi duh ang a hmuh that a nih thin loh vangin bawlhhlawh sawngbawlna hmunte hian harsatna an tawk thin a, bawlhhlawh phur motor semchhuah a ni hian he harsatna an tawh thenkhat a chhawk zangkhai ngei rin a ni.

Motor semchhuahna hun bakah hian heng bawlhhlawh sawngbawlna hmunin a huam khuate zinga bawlhhlawh thliarhrang ṭha leh user fee pe ṭha thlanchhuah khua 25 a dah turin vantlang bawlhhlawh bawm 688 semchhuah tel nghal a ni.

He motor semchhuahna hun hi PHED Engineer-in-Chief Er. Zodinthari’n a kaihruai a, SBM-G Mission Director Er. Lalropuia Hmar chuan technical report pe in PHED officers leh staff te an tel bawk a ni.