295/2025-2026

Lunglei, 2025 Ṭau thla ni 23: Mizoram sawrkara Public Health Engineering Department (PHED) Minister Prof. Lalnilawma chuan vawiin khan Lunglei khawpui tui lakna, Greater Lunglei Water Supply Scheme (GLWSS) hmun Pialthleng leh Tlawng lui tlawhin, Lunglei khawpuiin tui hnianghnar zawk a hmuh theih nana AMRUT 2.0 leh SASCI hnuaia GLWSS tihchangtlun hna thawh mek a enfiah.

PHED Minister hi Lunglei High Powered Committee (HPC) Vice Chairman & Lunglei North bialtu MLA Pu V. Malsawmtluanga bakah, Lunglei Municipal Council (LMC)-a Councillor Pu R. Lalramzauva, Rural Development & Administration (RD&A) Department Additional Secretary Pu V. Lalengmawia, Disaster Management & Rehabilitation (DM&R) Department Director Pu R. Vanrengpuia leh official dangte'n an ṭawiawm a. PHED Lunglei Circle-a Superintending Engineer Er K. Zohmingliana hovin PHED official-te leh hna thawktu contractor te'n lo dawngsawngin, GLWSS tihchangtlunna tur ruahmanna leh hna thawh mekte an lo kawhhmuh bakah, an harsatna leh hmachhawpte Minister hnenah hian an lo thlen a ni.

Lunglei tui lakna, GLWSS tihchangtlunna tur hian ṭhuang hnihin hma lak mek a ni a. Kum 2054 (kum 30 hnu) thlenga mihring 1,11,827 chawm thei tur, Tlawng leh Pialthleng lui aṭanga tui lakna tur ruahmanna, upgradation of GLWSS (pumping & distribution system) chu SASCI (Scheme for Special Assistance to States for Capital Investment) 2024-2025 sum cheng vaibelchhe 55.7 (₹ 55,70,00,000/-) senga bul ṭan chhoh mek niin, civil work hi PHED-in departmental work-a thawkin, hmanrua leh khawl mamawh erawh chu supplier hnen aṭanga lak a ni a. He project-ah hian tui lakna main pipeline tihchangtlunna tur te, tui tihthianghlimna leh sawngbawlna (water treatment plant) tihchangtlunna leh siam belhna tur te, pump house leh a khawl thar dah belhna tur te, tui sem darhna (distribution system) leh electrical sub-station tihchangtlunna tur te a tel a. Tunah hian hmanraw mamawh chhek khawm fel tawh niin, pump house leh sedimentation tank tur laih zawh tawh a ni bawk a. He project hi zawh a nih hun chuan tuna tui lak mek, 3.5 MLD (Million Litres per Day) aṭang hian 5.5 MLD-a pungin, ni tin tui litre maktaduai 9 (9 MLD) pe chhuak thei tura beisei a ni. 

GLWSS tihchangtlun nan hian AMRUT (Atal Mission for Rejuvenation and Urban Transformation) 2.0 sum cheng vaibelchhe 4.7 (₹ 4,70,00,000/-) hmangin fur tui tam laia tui litre maktaduai 240 khuah tlin theihna tur Tlawng lui tui khuah (gravity dam siam) hna thawh mek a ni bawk a. He hna hi HS Construction, Chanmari, Aizawl te'n thawkin,  February ni 27, 2024 khan agreement ziah a ni a. Hna ṭan tura hmanrua lak khawm ṭan a nih laiin furin a nan avangin kumin February thlaa zawh tura ruahman chu zawh theih a nih tak loh avangin hna thawh hun hi kumin August ni 31 thleng pawh sei a ni a. Tui khuahna dam hi a bulṭhut (foundation) nen metre 15-a sang tura ruahman niin, tunah hian a foundation metre 2 leh dam metre 4.5, a vaiin metre 6.5-a sang siam zawh tawh a ni a. Tui khuah hna thawhna AMRUT 2.0 fund hi central aṭanga pawisa dawn a la nih loh avangin contractor te hian anmahni sum sengin an thawk rih a ni.

PHED Minister Prof. Lalnilawma chuan GLWSS tihchangtlun hna thawh mek chu Lungleiin tui thianghlim hnianghnara a hmuh theihna tura hma lakna pawimawh leh lawmawm tak a nih thu sawiin, hna ṭha tak leh chak taka kalpui a nih theih nan department leh contractor-te chu theih tawp chhuah turin a chah a. Tlawng tui khuah hna thawhna AMRUT 2.0 sum chu a chhuah thuai theih nan Mizoram sawrkar chuan central lam dawrin, an nawr reng tih a sawi bawk.