506/2026-2027

Lunglei, 2026 Ṭomir thla ni 13: Mizoram sawrkara Public Health Engineering Department (PHED) Minister Prof. Lalnilawma chuan vawiin khan Lunglei khawpui tui lakna, Greater Lunglei Water Supply Scheme (GLWSS) hmun Pialthleng leh Tlawng lui tlawhin, Lunglei khawpuiin tui hnianghnar zawk a hmuh theih nana AMRUT 2.0 leh SASCI hnuaia GLWSS tihchangtlun hna thawh mek a enfiah.

Minister hi RD&AD Additional Secretary Pu V. Lalengmawia, LAD Director Dr Lalngura Tlau leh official dangte'n ṭawiawmin, PHED Lunglei Circle-a Superintending Engineer Er Lalsanga hovin PHED official-te'n an lo dawngsawng a. GLWSS tihchangtlun hna thawh mekte thlir hovin, hna thawh zel dan tur ruahmanna leh hmachhawpte an sawi ho.

PHED Minister Prof. Lalnilawma chuan Lunglei khawpui chawmtu tui lakna tur Tlawng lui khuah hna zawh fel thawkhat a ni ta chu lawmawm a tih thu leh he tuikhuah hmang hian Lunglei khawpuiin tui lama harsatna a tawh ṭhin tam tak chu sut kian a nih tur thu sawiin, PHED-a thawktute leh hna thawktu contractor-te chungah leh hna thawh laia hre thiam taka dawh hram hram ṭhintu Lunglei mipuite chungah lawm thu a sawi a. Hetih rual hian tui semna hmanrua leh a dah khawlna lam duh anga inpeih fel a la nih loh avanga mipuite beisei anga tui hnianghnar zawka sem theih a la ni lo chu pawi a tih thu sawiin, mipuite'n hnianghnar zawka tui an hmuh theih nan hmachhawp hrang hrang a awm thu leh chak zawka hma lak chhoh zel a nih tur thu a sawi.

GLWSS tui lakna Tlawng luia tuikhuah (Gravity Concrete Impounding Dam) siam hna hi cheng vaibelchhe 4.7 sengin HS Construction Pvt Ltd, Aizawl te'n thawkin, tuikhuah hi metre 13-a sang a ni a. A hnar lamah kilometre 1.5-a thui chimin, tui luan liamna Spillway ṭha taka siam a ni a. Spillway an siam dan hi a chhuanawm hle niin PHED hotute pawhin an sawi. Tuikhuahna chungah hian lei (bridge) mawihnai taka siam turin hma lak leh mek a ni a. Tui hi a khuahnaah a tling khat a nih chuan litre maktaduai 240 million tling thei tura chhut a ni.

Tuna Lunglei tui pump mekna – Greater Lunglei Water Supply Scheme hi November ni 22, 1995-ah hman ṭan niin, tunah hian kum 30 chuanga upa a ni tawh a. Lunglei tui lakna, GLWSS tihchangtlunna tur hian ṭhuang hnihin hma lak mek a ni a. Kum 2054 (kum 30 hnu) thlenga mihring 1,11,827 chawm thei tur, Tlawng leh Pialthleng lui aṭanga tui lakna tur ruahmanna, "Upgradation of GLWSS (Pumping & Distribution System) chu SASCI (Scheme for Special Assistance to States for Capital Investment) 2024–2025 sum cheng vaibelchhe 55.7 (₹ 55,70,00,000/-) sengin hma lak mek a ni a. AMRUT (Atal Mission for Rejuvenation and Urban Transformation) 2.0 hnuaiah sum cheng vaibelchhe 9.9778 sengin "Improvement of Water Sources and Extension of Distribution System for Greater Lunglei Water Supply Scheme" hna thawh mek ni bawkin, Tlawng lui khuah hna hi he project hnuaiah hian thawh a ni.