1611/2025-2026

Dated Aizawl, 26th September 2025: Nimin khan Public Health Engineering Department Minister Prof. Lalnilawma chuan Vaivakawn, Zohnuaia lei chein a tih chhiat, Greater Aizawl Water Supply Scheme (Phase - III), tui kawng siam that hna thawh mek chu a hmunah kalin a endik a, hnathawktu leh Contractor-te hmuin a rang thei ang bera hna thawk zo turin a chah a, he hna thawktu Eco Engineering Pvt. Ltd hotute chuan, khuain a zira harsatna dang a awm loh chuan ni 15 chhunga hna thawh zawh theih an inbeisei thu an hrilh. Minister hi PWD leh PHE Department hotuten an tawiawm a ni.

Zohnuai hmuna SIPMIU tui pipe phum hi, kumin ruahtui tla nasa avanga lei che khan ti chhiain, lei hnuaiah tui a put a, helai hmuna lei hi a chet tak reng avang leh veng mipuite tan hlauhthawnawma a lan avangin, fur ruahtui tlak tam laia leih laih chet leh hna thawh chak theih a ni lo a, tunah hian siam that hna thawh mek zel niin ruahman anga a kal chuan ni 15 hnuah tui supply chhunzawm theih beisei a ni.

Minister chuan tui kawng chhiat avanga mipuiten harsatna an tawh thin chu pawi a tih thu a sawi a, mipuite hriatthiamna ngenin theihtawp chhuaha hma a lak zel tur thu a sawi a ni.