No.3049/2021-2022

Aizawl, the 18th November 2021 : Vawiin khan Rural Development Minister Pu Lalruatkima chuan Phulpui ah Zawlpala Thlan Tlang tlawhtute tana motor dahna hmunhma Vehicle Parking Building sak thar leh hemi hnuaia YMA House sak te chu a hawng. Aizawl South-III bialtu MLA Prof. F. Lalnunmawia pawh programme ah hian a tel a ni.

Pu Lalruatkima chuan Phulpui a awm Zawlpala Thlan Tlang chanchin hi Mizo thawnthuah chuan thawnthu ngaihnawm tak Pathian thilsiam ropui zia tilangtu nia a hriat thu sawiiin Phulpui leh a chhehvel chu khualzin hip theihna potential nei tha tak mai a ni a ti a. Hengte hi a khaw mipuiin a hlawkna an tel dan kawng hrang hrang an ngaihtuah a pawimawh tiin eco-tourism, adventure tourism leh rural tourism a hmalak theih dan thenkhatte a sawi a. YMA in phal taka helai hmun mipui awlsamna atana an pe chu lawmawm a tih thu a sawi bawk.

DRDA te kal zelna tur atana Sawrkar Laipuiin a funding a titawp dawn tia tunhnaia thu lo ri chhuak leh chungchang sawiin Minister chuan hei hi an sawina a rei tawh a mahse a thawktu te tan thlaphanna tur a awm lova, mi 87 lai Mizoram Sawrkarin a absorb tawh a, a bang mi 25 chungchang pawh Sawrkar in a ngaihtuah reng a, anni bakah hian MR te pawh a hre reng a. An chungchang ngaituah hi Sawrkar mawh a ni a, Sawrkarin an tan kawng a kharhnan lovang tih ka ring tlat a ni, a ti. 

Mizoram in SPMRM project a nei chu a vanneih thu sawiin Aibawk Cluster leh East Lungdar Cluster tih that vangin Cluster dang 2 - Khawzawl Cluster leh Thingsulthliah Cluster hmuh belh chhan chu thawktute inpekna leh thawhrimna leh an inkar leh mipuite thawhhona leh tanruala a that vang nia sawiin Sawrkar ruahmanna reng rengah neitu rilru pua infinchhuah leh intawiawm zel a pawimawh tiin chutiang rilru pu turin mipuite a chah a ni.  

Prof. F. Lalnunmawia chuan Phulpui chu khaw entawntlak, taima leh tlawmngai nia a hriat thu sawiin Phulpui a awm Zawlpala Thlan Tlang leh Tuirivang lui tlawhtute an tam zel avangin helai hmunhma buatsaih a pawimawh a ti a. Hrileng karah RD Department in parking hmun hma an sak chu lawmawm tiin Tourism Department te pawhin helai hmun cheibawlna turin hma la ve se tiin a duh thu a sawi. 

He hmunhma hawnna puala programme tawite chu Pu R. Lalthazuala, Director RD Department chuan kaihruaiin Pu Chinlianmanga, BDO Aibawk in a sak dan chungchang Technical Report a sawi a ni. 

Vehicle Parking leh YMA House hi Shyama Prasad Mukherjee Rurban Mission (SPMRM) leh MGNREGS Convergence fund hmanga sak niin SPMRM atangin cheng nuai 15 leh MGNREGS Convergence atangin cheng nuai 5 ruahmanin a vaiin cheng nuai 20 senga sak a ni a. Phulpui Branch YMA in helai hmunhma an pek avangin Parking hnuaiah YMA House hi sak a ni a. Lirthei dahna hi a dung feet 30 leh a vang feet 24 a ni a, lirthei te chu LMV 6 leh ke pahnih nei lirthei 24 vel a dah theih a ni.

Phulpuia awm Zawlpala Thlan Tlang tlawhtute hi an pung zel a. A tlang panna a motor dahna chu hmun chep tak a ni thin a. Helai hmunhma thar hi mipui tana thil tangkai tak a ni dawn a ni. Phulpui khua hi bialtu MLA in Model Village atan a thlan niin kawng hrang hranga a khaw hmasawnna tur hi ngaihtuah chho mek zel a ni. 

Minister hi Rural Development Department, Directorate leh Secretariat officer thenkhat leh MzSRLM leh SIRD&PR Director ten an tawiawm a ni.