No.3251/2020-2020

Aizawl, the 20th July 2020 : Vawiin khan Pi Harsimrat Kaur Badal, Union Minister for Food Processing chuan video conferencing in Khamrang a cheng vaibelchhe 75 senga din Zoram Mega Food Park chu a hawng a. A hawnna programme tawite NIC Video Conferencing Room Treasury Square a neihah Commerce & Industries Minister Dr. R. Lalthangliana chuan Zoram Mega Food Park hawnna thuziak plaque chu Union Minister aiawhin a pawt pharh a ni.

Zoram Mega Food Park hawnna hi Dr. Jitendra Singh, Minister of State (Independent Charge), Ministry of Development of North Eastern Region leh Pu Rameshwar Teli, Minister of State for Food Processing Industries te pawhin an hmanpui a. P&E Minister Pu R. Lalzirliana, Lok Sabha MP Pu C. Lalrosanga, Pu Andrew H.Thangliana, Tuirial bialtu MLA, Pu C. Ramhluna, Vice Chairman, Industrial Development Board te pawhin he hun hi hmanpuiin Commerce & Industries Department hotulu te leh Zoram Mega Food Park Board of Directors te an tel a ni.

Pi Hamsimrat Kaur Badal chuan Prime Minister Modi a kaihhruai Sawrkar chuan hripui leng karah pawh kawng hrang hrangah ram intodelhna turin hma a la a, chung zingah chuan ei leh in sawngbawl food processing pawh tel in nasa tak a Ministry in hemi kawngah tan an lak thu a sawi a. Zoram Mega Food Park chuan food processing kawngah Mizoram chu bung tharah a kai tir ngei a rin thu sawiin Mizoram a kuthathawktu ten an tharchhuah man man zawka an hralh theih a rin thu bakah thalai food processing lama eizawng duhte tan remchanna tam tak a siam sak ngei a rin thu te pawh a sawi a ni. Mizoram-in a tharchhuah te hlawk zawka a tihpun kawngah leh kuthnathawktute sum lakluh tihpun kawngah te Zoram Mega Food Park chuan thui tak kawngro a su thei niin a sawi a. Hmarchhakah a Ministry in project 88 a kalpui mek tih sawiin chung zinga 7 chu Mizoramah kalpui mek a ni, a ti.

Dr. Jitendra Singh chuan Ministry of Food Processing, Mizoram Sawrkar leh Zoram Mega Food Park Board of Directors ten Zoram Mega Food Park dinna kawngah theihtawp an chhuahna zarah vawiina hawn a ni ta chu a lawmpui tih a sawi a. Mizoram chu state te ni mahse state dangin Mizoram atangin zirtur an nei tiin chung zingah chuan ziak leh chhiar tam dan te, mipuiin Sawrkar an tawiawm that dan te leh khawtlang leh Sawrkar tangkawpin hripui an dona kawngah hmalak dan te chu sawilangin hengte hi state dangte tan a entawntlak tih a sawi. Food Processing lamah Mizoram in potential a neih chu Food Park kaltlangin nasa takin kawng thar tam tak a in hawn ngei a beisei tih a sawi bawk a ni.

Pu Rameshwar Teli chuan ei leh in sawngbawl lamah tun hmaa duh anga a sawngbawlna hmun ramin a neih tam loh avangin food processing lamah hmasawnna a thuanawp thu sawiin food processing lamah ramin hma a sawn nan Mega Food Park hi Ministry in a duangchhuah a ni, a ti a. Tharchhuah tawih ral thei mai leh dah rei theih loh chu food processing technology hmanga sawngbawl leh vawn chuan loneitute hlawkna a tihpun theih mai bakah thalai tan eizawnna kawng thar tam tak a siam sak thei a ni a ti. India ram pumah Mega Food Park 37 Ministry in a kalpui mek tih tarlangin chung zinga 18 te hawn ni tawhin hna an tan mek tih a sawi.

Dr. R. Lalthangliana chuan Zoram Mega Food Park chu food processing kawngah Mizoram in mellung pawimawh tak a kai tharna a ni tiin Sawrkar flagship programme SEDP nen pawh a thil tum te a in zulin loneitute leh kuthnathawktute pawhin an hlawkpui a beisei tih a sawi. Food Processing chu Mizoram Sawrkar in a ngaipawimawh hle tih sawiin Ministry of Food Processing kaltlanga hmalakna te chu theitawp chhuahin tih puitlin mek zel a ni a ti. Zoram Mega Food Park chuan kuthnathawktute sum lakluh a tihpun theih bakah thalai entrepreneur te tan hma lakna tur kawng tam tak a hawn theih thu leh midang tam tak tan eizawnna kawng a siamsak theih thu a sawi. He park a hman tawm thei khawl leh hmanraw dang bun chuan Small Scale a food processing unit din duhte tan kawng a in hawng zau theiin an tan malsawmna a ni thei a ni, a ti a. Sawrkar in Food Park ah beiseina sang tak a nei tiin food processing company lian tak tak te pawhin an sum peipun nan remchang la se tiin a duh thu a sawi bawk a ni.

NH-54 hrula Khamranga Zoram Mega Food Park Pvt. Ltd hi ram acre 55 a zauah cheng vaibelchhe 75.20 senga din niin cheng vaibelchhe 50 chu Ministry tum niin a bak chu Board of Directors te tum a ni a. He Food Park ah hian inhman tawm thei khawl leh bungrua changkang leh tunlai tak tak bun a ni a. Chungte chu 1000 metric tonne dah theihna Cold Storage te; 3000 metric tonne dah theihna Drywarehouse; darkar khat zelah 2 metric tonne sawngbawl thei Aseptic pulp line, canning, aseptic leh tetra packing thei; darker khat zelah 40 metric tonne sawngbawl thei Ripening Chamber te; darkar khat zelah thil tihro theihna te, Food Testing Laboratory leh food processing lamah hman theih thil dangte a awm a ni.

Attachment

  • Loading attachment...