1640/2024-2025

Aizawl, the 19th August, 2024: Health & Family Welfare Minister Pi Lalrinpuii chuan vawiin chawhma dar 10:00 khan Health & Family Welfare Department hnuaia Office hrang hrang leh Damdawiinte laka vuivaina leh lungawilohna thlen duhte tana Online hmanga thlen theihna tur Online Grievances Redressal Portal 'Vahui' tia vuah chu a Office Chamber, MINECO ah a tlangzarh.

Pi Lalrinpuii chuan Health & Family Welfare Department hnathawh dan leh rawngbawlna kawngah mipuite'n harsatna leh lunglawilohna an neihte, awlsam taka thuneitute hnena online hmanga an thlen zung zung theihna tur 'Vahui' tlangzarh a ni ta chu lawmawm a tih thu sawiin, "Hei hi department tana hmasawnna chhinchhiah tlak tak leh chona thar petu tur a ni", a ti a. Mizo thawnthua Tualvungi ko thiam Vahui tangkai taka hman a nih ang bawka thuneitute koh eihna tura Health & Family Welfare Department-in Vahui Online Portal a siam chu chhuanawm a tih thu sawiin, "A hlawhtlinna atan mipui leh Department thawktute tanrualna a pawimawh dawn a, theihtawp kan chhuah tlan theuh a tul a ni", a ti a. Vahui chu mipui leh Health & Family Welfare Department inkara palai hna thawk tur, harsatna leh lungawilohna hrang hrang nei, kalna tur leh puitu tur hrelo tam takte tanpuitu tur hmanraw tangkai tak a nih a beisei thu a sawi a ni.

Health & Family Welfare Minister chuan Vahui Online Portal siam chhan sawifiahin, "Mizoram Sawrkar-in vuivaina leh lungawilohna thlenna tur portal 'Mipui Aw' nei tho mah se, Health & Family Welfare Department hnuaia Office zawng zawng, District hrang hranga Sub-Centre hla ber atanga Office pui ber Secretariat thlenga harsatna thlenna tur leh a chinfelna kawng felfai tak mamawhna a awm avangin Vahui Online Portal hi siam a ni a, mipuite'n tangkai taka an hman beisei a ni", a ti a. Online portal hlawhtlinna chu Office leh Damdawiin zawng zawnga Grievance Redressal Committee-te kutah a innghah tlat thu sawiin, Nodal Officer-te leh Committee-te chu mipui rawngbawlna, a bik takin 'Vahui' hlawhtlin theih nana theihtawp chhuah turin a sawm nghal a ni.

He hun hi Pi Sangchhin Chinzah, IAS, Secretary, Health & Family Welfare Department chuan kaihruaiin Dr. Eric Zomawia, Project Director, Mizoram Health System Strengthening Project hnen atangin technical report ngaihthlak a ni a. Dr. Vanlalsawma, Pricipal Director, Health & Family Welfare Department chuan lawmthu sawiin hun hman a khar a ni.

Vahui Online Grievance Portal hi web-based online portal niin Mizoram Health Systems Strenthening Project (MHSSP) bultuma siam a ni a. Online-in phone leh computer atangin awlsam taka vuivainate thlen theih a nih bakah chinfel a nih dante a chhuizui theih a. RTI leh a kaihhnawih, thubuai kallai leh thurawn angte erawh a huam tel lo a ni.

Hemi atan hian Health Facility leh Office zawng zawngah Grievance Redressal Committee din niin Nodal Officer-te ruat an ni a. Committee hi Level 4, State Level Committee, District Level Committee, Facility Level Committee leh Sub-Centre Level Committee-te siam a ni a. www.vahui.in ah vuivainate thlen tur hian mimal information ziah luh hmasak a ngai a, a ziakluttu phone number-ah Tracking ID SMS in pek a ni ang a, he ID hmang hian an thu thlen chu a thlen chin a chhui theih a, thuneitute'n an chinfel hnuah SMS in chinfel a nih thu hriattirna a dawng ang a, web portal-ah hian chinfel a nih dan a chhuizui theih dawn a ni.

Vuivaina leh lungawilohna lo lutte hi State Screening Center (National Ambulance Services, NHM) chuan lo thliarin a thlenna tur Target office emaw Facility-ah portal kaltlang hian a thawn ang a, Nodal Officer-te'n SMS a hriattirna dawngin a tul angte an bawhzui ang. Ni 7 chhunga chinfel hman tur niin, chinfel a nih loh chuan a aia thuneitu sang zawkah thlen a ni ang. Chinfel dan hi portal-ah en theih tura dah tur a ni a. Portal-a inziaklut theilo tan Grievance Redressal Helpline No 104 ah phone hmangin a biak theih a, portal-ah hian an thu thlen duhte ziahluh sak an ni ang. Heng bakah hian Facility tinah Help Desk a awm zel dawn a, Grievance Box-a vuivaina lutte hi facility in-charge te'n online portal-ah an lo ziaklut zel thin dawn bawk a ni.