Sorkar laipuiin rampum huapa pi pute sulhnu leh an hmunhma humhalhna tura a hmalakna National Commission for Heritage Sites Bill 2009 kalpui mek chu Mizoram-ah pawh he Dan zirchiang turin Sub-Committee din a ni a. He Sub-Committee chuan Mizoram sorkarin a ngaihtuah mek Mizoram Heritage Conservation Bill 2009 leh sorkar laipui dan kalpui mek inkarah engmah inkalhna awm loh thu leh Mizoram state chhungah pawh he Dan thar hian pi pute sulhnu humhalh kawngah nasa takin a pui thei dawn a ni tih vawiin khan Art & Culture Minister P.C.Zoram Sangliana hovin State Level Co-ordination Committee on Cultural Heritage ten an sawiho a ni.
He Dan duan mek thlithlai tura ruat Pu Lalram Thanga, IFS, Pu Rinsanga, IAS (Rtd) leh Pu Ngurbiaka, Jt. Director, Art & Culture te chuan sorkarah bawhzui zela Mizorama hman thuai tha an ngaih thu Minister an hrilh a ni. Mizoram Heritage Conservation Bill 2009 hi a taka kenkawh a nih hunah chuan pi pu sulhnu leh hmunhma rotling tham reng rengte chu mimal emaw pawl ho kutah emaw a awm thei dawn tawh lova, Dan leh hrai hnuaiah Mizoram sorkar-in a humhalh tlat tawh dawn a ni.
