He thu hi Mizoram a cham mek Chief Commissioner for Persons with Disabilities Pu Prasanna Kumar Pincha chuan vawiin chawhnu a Mizoram sawrkar Secretary lian te a kawmna ah a sawi a. Pathian in mitin reng awmze nei leh tih theih nei in a siam a, kan thiamna mual leh kan thawh theih te a in ang lo mai chauh a ni tiin pianphunga rual ban lote duata enkawl tha turin sawrkar thuneitute chu a ngen a ni.

Meeting hi Mizoram state hnuaia persons with disabilities Commissioner Pi B.Sairengpuii in a kai hruai a.He hun ah hian pian phunga rualbanlote tana sawrkar department hrang hrang hnuaia hmalak mek te leh hmachhawp te sawi ho a ni. Mizoram sawrkar aiawh in Pu R.L. Rinawma, Principal Secretary, Pu Lalrinliana Fanai, Commissioner/Secretary, Pu Hrangtawna, Secretary, Pu F.Vanlalruata, Secretary, Pu K.Lalmuana Addl.Secretary, Pu Lalbiakzama, Joint Secretary, Pu C.Lalchhuana joint Secretary, Pi Malsawmthangi, Director leh Pi Vanlaldini, Director te bakah Department hrang hrang aiawh sawrkar mipawimawh te meeting ah hian an tel a ni.

Chief Commissioner chuan pianphunga rualban lote an chanvo dik tak te an hmuh theihna kawng kawhhmuh leh zawn sak hi kan tihtur pawimawh tak leh rawngbawlna a ni a. Anni enkawlna hna hi Social Welfare Department hma bik a ni reng reng lova, Department zawng zawngin pianphunga rualbanlote hmasawnna turin hma an lak vek a ngai zawk a ni a ti. Persons with disabilities act, 1995 chu Department hotuten leh sawrkar hnathawk ten an la hrechiang vak lova a lang chu a pawi a tih thu a sawi a. Chiang zawka heng mikhawngaihthlak leh tanpui ngai em em te chanvo te hi sawrkar hnathawk ten an zirchian a ngai a ni a ti.

Sawrkar hnalak hrang hrang ah te PWD act hnuaia section 32 leh 33 in a phut anga 3% seat reserved chu palzut thianglo a ni a ti a. Piangphunga rualbanlo ten sawrkar hnalak chungchangah harsatna an neih te hi state sawrkarin chiang taka ziaka Central sawrkar hnena arang lam a thlen a ngai a ni a ti. Mi vanduai te hlamchhiah mai lovin an tih theih leh an chhawr theihna lai hrechiang hmasa in an thawhtur awm tawk eizawnna hna siam sak zung zung tur leh chhuanlam zawnga dang khawtlai thin lo turin sawrkar thunneitute a ngen thu a sawi a ni.

Vantlang inkhawmna hmun an hman ve theihna tura kawngawlsam zawn sak, NREGA te an thawh ve theihna tur kawng zawn sak te, zirna kawnga an hmanraw mamawh pekte bakah inhmun lo ram pek chungchanga duh sak an tulna te a tarlang bawk a ni.