550/2024-2025
Aizawl the 24th May, 2024: Mizoram Pig Producers' Cooperative Federation (PIGFED) Limited Management Committee chuan ASF hrileng avanga kan society member-te leh vawk vulhtu engemawzat ten vawk thahnem tak an chan avang leh a la him damte pawh hralh a harsat avanga Piggery Farmer te manganna kan hria a, pawi kan tiin kan tuarpui takzet a ni.
AH & Vety Department report-in a tarlan angin, kumina hri thawk thar leh hi, Champhai district-a Leithum leh Vanzau khuate a intanna ni a hriat a nih avangin, khaw-chhak lam leh state pawn atanga vawk tawlhluh thinte khuahkhirhna kawngah sawrkarin tan la zual zel sela, mipuiin thu awih bawk ila ziaawm lam kan pan thuai kan beisei a ni.
Kum 2021-2022 hrilengah khan PIGFED Ltd. pawhin a innghahna ber vawk 300 lai mai a lo chan ve tawh a. Inkhaichhuah leh tuma kawng kawng hrang hranga tan kan lak mek lain, Mizoram Pig Farmers Association (MIPFA) ten phailam atanga Frozen meat chawluttu emaw min tih avangin min lo ral beih thin tih kan hria a, inkawmhona neihpuiah kan sawm angin April ni 15, 2024 khan kan thukhawm a, frozen meat kan lakluh loh thute, chhiat kan lo tawh ve tawh avangin dinhmun siam tuma kan hmalakna hrang hrang zingah frozen pork chawluttu (stockist) te hnen atanga lain kan lo zuarchhawng ve thin a, chu pawh chu hma thar lak kan turn avangin mumala kan kalpui tawh loh thu kan hrilh ta a. Thil awmzia an hriatchian tak avangin boruak tha tak hnuaiah kan tin ta a ni.
Chutiang a nih hnuah rin loh leh beisei loh takin May ni 20, 2024 khan frozen vawksa an rawn ken chu PIGFED dawr kawtah an rawn hal a, nasa takin media-ah an vawrh darh ta mai a. Hei hian min tham lohzia leh kan inkawmhona khan awmzia a neih lohzia a tichiangah kan ngai a, pawi kan tiin kan hrethiam lo takzet a, tun hnuah chuan thleng tawh lo se kan ti hle a ni.
PIGFED Ltd. hian vawk vulhtute tan theihtawpin hma a la reng a. Farm-te dinthar lehin vawk thahnem tak kan tharchhuak leh mek a. Ranvulhtute tan tualchhunga siam, ranchaw tha leh man tlawm kan zuar mek bawk. Tin, Aizawl leh a chhehvela vawkpui vulhtu thahnem takte kalchilhin Artificial Insemination Technology hmangin vawk kahrai hna a thawk reng a. April, 2023 atanga March, 2024 chhunga vawk kahrai atanga piggery farmers ten vawk note an tharchhuah zat chu 41299 nos. a ni a, sum faia chantirin ₹ 28,90,93,000.00 hu lai a ni.
