Sorkar laipuiin Financial Year kal lai mek chhunga hman tur sum engemawzat a bituk belh chu ruahman thiam nan ram chhunga state zawng zawng ten an mamawh ang scheme/project rawn siam tura hrilh an ni a. Hemi bawhzuiin vawiin khan Mizoram tana tangkai leh mamawh scheme leh Project tur sawi hovin Chief Secretary Conference Room-ah meeting pawimawh tak neih a ni. Home Minister Pu R. Lalzirliana hovin Ministers, Parliamentary Secretaries, Commissioners & Secretaries, Heads of Department bakah Planning Commission hotuten scheme kalpui mek lai leh siam thar tul te an ngaihtuah ho a ni.
Sorkar laipuiin he sum bituk belh cheng vaibelchhe 20,000/- chu thingtlang lam chawikanna atan te, infrastructure tih changtlun nan leh khawtlang hmasawnna hrim hrim atana hman tur a nih tih chiang takin a sawilang a. Hei bakah hian PMGSY hnuaiah cheng vaibelchhe 1900/-, JNNURM hnuaiah cheng vaibelchhe 4200/-, NREGS hnuaiah cheng vaibelchhe 3500/-, IAY hnuaiah cheng vaibelchhe 3050/-, AIBP hnuaiah cheng vaibelchhe 2300/- leh NSAP atan cheng vaibelchhe 1000/- te a ruahman belh bawk. India ram ei leh bar leh sum leh pai dinhmun chawhnun tharna atan hei hi sorkar laipuiin a chhawp chhuah a ni.

Vawiina meeting-ah hian sorkar laipui ruahmanna bika scheme/programme kalpui lai mek te bakah Mizoram state tana NLUP kalpui dan tur, kawngpui sial, khawpuia cheng mirethei chawikanna tur, solid waste management, tui lakna, kawlphetha, in sak, sorkar office leh hnathawktute insak chungchang te pawh sawiho a ni.