Vawiin khan Planning Secretary Pu C.Vanlalramsanga hovin Mizoram sawrkar hnuaia department hrang hrang hotulute chuan Secretariat Conference Hall, New Secretariat Complex-ah data leh statistics rintlak neih dan tur an rel.

Meeting kaihruaitu Pu C.Vanlalramsanga chuan department tin ten sawt zawka hna an thawh theihna turin data leh statistics mila Mizoram hmasawnna hna thawh dan tur policy duan tum a ni, a ti. Data dik leh rintlak a hun taka neih a nih chuan policy duan leh a bawhzui kawngah nasa takin thawktute a tanpui thei dawn a; ram sum leh pai dinhmun, ei leh bar zawnna siamthat kawngah leh mipui mimir nitin mamawh pekna kawngah awmze nei leh sawt zawkin hna thawh theih beisei a ni, Secretary chuan a ti a. Tun dinhmunah Mizorama data leh statistics neih mekte chu mamawh mil (need based) a lakkhawm a nih avangin rintlak tawk loh a awm fova, thil thuhmun rengah department hrang hrang data neih dan a inmil lo fova. Chuvangin data leh statistics mila policy siam a har hle a ni, a ti bawk.

Sawrkar chuan data dik leh rintlak a hun taka lakkhawm a nih theihnan hma a la mek a. Kum kalta November ni 20 khan University mithiam te, tlawmngaipawl aiawhte, political party hrang hrang aiawh leh sawrkar official kalkhawmte chuan data dik leh rintlak neih dan tur nia an hriatte thawhkhawmin rawtna an siam a. Chu rawtna mil chuan approach paper duang chhuakin ruahmanna siam a ni ta a ni.

Vawiin meeting-ah hian data lakkhawm dan tur leh a hun tur te, tihsual palh a awm lohna tura department leh an hnathawh dan mila data rintlak neih dan tur kaihhruaina chungchang an ngaihtuah a. Hemi atan hian training leh workshop pawh a tul dan anga neih a nih tur thu tarlan a ni. Department tinte hnathawh dan a inan loh avangin mahni department theuhah data leh statistics lakkhawm leh thehluh hun tur (frequency of submission), an data theuhin a huam chin tur leh hetiang lama thiamna an mamawh dan te sawihova, thla thar April ni 3 aia tlai lovah Planning & Programme Implementation Department hriattir nise tiin an rel a ni.