1950/2022-2023
Aizawl, the 16th September 2022 : North East State zinga Agriculture lama ti tha ber lawmman dawnga New Delhi-a cham mek Irrigation and Water Resources, Agriculture leh Cooperation Minister Pu C. Lalrinsanga chuan nimin September Ni 15, 2022 tlai khan Union Power and Renewable Energy Minister Pu RK Singh chu a pisaah hmuin PM KUSUM kalpui dan chungchanga Mizoram mamawh leh harsatnate a thlen.

PM KUSUM hnuaia Solar Water Pump vendor tura Sawrkar laipuiin a thlan ten Benchmark cost a hniam ti a hna an tan duh loh avanga Mizoram loneituten harsatna an tawh mek chu a rang thei ang bera sutkian a tul thu Irrigation Minister Pu C. Lalrinsanga chuan Union Minister hnenah hian a thlen a. Minister chuan Mizoram leh North East state thenkhat te tan rate tha zawk siam a nih loh chuan vendor tha hmuh zawh loh mai a hlauhawm thu a hrilh a. Khawchhak ram dang depa awm Mizoram state tana Sawrkar laipui hnathawh that dan chu thenawm ram te laka India ram hmel lanchhuah dan pawimawh tak a ni tiin Union Minister chu a rang thei ang bera Mizoram loneitute harsatna hi sukiang turin a ngen a ni.

Union Power and Renewable Energy Minister Pu RK Singh chuan Pu C. Lalrinsanga rawtna hi pawmin PM KUSUM hnuaia Solar Water pump atana rate an lo duan tawh chu Mizoram leh Northeast state dangte tan siam that a nih tur thu a lo hrilh a ni. Tin, Union Minister chuan a rate awmsaa tender chhang a, hna pawh hmu tawh tu Vendor thawk tha leh duh si lo chu blacklist an ni ang a ti bawk a ni.

PM KUSUM hnuaiah hian Loneitute tan Solar Water pump ruahman niin tunah hian state engmaw zatah chuan Sawrkar laipuiin a thlan vendor ten installation hna thawkin hma an la tawh a. Mizoram tan pawh Sawrkar laipuiin vendor te an rawn thlang fel tawh a. Vendor te hian Mizoram loneitute tan supply leh installation an tih a hun hle tawh laiin Sawrkar laipuiin rate a siam (Benchmark cost) chu Mizoram leh tlangram state thenkhat, transportation leh thil dang harsat bikna state atan chuan a hniam tiin an tih tur an rawn ti duh ta lova. Hetiang a nih avanga Mizoram loneituten harsatna an tawh chu Mizoram sawrkar pawhin Sawrkar laipuiah a lo thlen tawh thin a. Sawrkar Laipui chuan mahni state chhunga tender lo float mai turin Mizoram sawrkar chu a rawn nghe nghe a. Amaherawhchu, Central Sawrkarin benchmark rate a siam chu tlangram state tan chuan a hniam lutuk avanga vendor tha hmuh a har thu Irrigation Minister hian Union Minister hnenah hian a thlen a ni.

Irrigation Minister Pu C. Lalrinsanga rawtna te chu Mizoram mai ni lo, Northeast state dangte pawhin an chhawr dawn a. Rate revise tura Union Minister in hma lak a nih tur thu a lo hrilh chu a lawmawm tak meuh a ni tiin Minister Pu C. Lalrinsanga chuan a rang thei ang bera hma la zui turin Union Minister chu a ngen nghal bawk a ni.