2214/2026-2027

15th September, 2026: Vawiin khan PM Vishwakarma Tribal Artisan Empanelment Mela (TAeM) chu Directorate of Commerce & Industries, Conference Hall, Aizawlah neih a ni a. Commerce, Industries, Geology & Mining Department Secretary Dr H.Lianzela’n a hawng.

Dr H.Lianzela chuan Mela-a tel artisan leh Entrepreneur te chu fuihin, an kutchhuakin belhchian dawl se, a leitu tur mipuiten lei nawn leh an chak theih nan quality ṭha taka siam turin a chah a. Tun aia tam siam chhuak thei tura ruahmanna siam tur leh khawvel ram zau zawka hralh chhuak thei tur khawpa nasa lehzuala ṭang turin a fuih a ni.

Commerce, Industries, Geology & Mining Department Joint Secretary Pi H.Lalchhandami kaihhruai Mela hawnna programme-ah hian Pu Pamthing Keishing, Regional Manager, NorthEast, Guwahati chuan thu a sawi a. TRIFED hmalakna te leh an hnuaia mite an thawhpui dan leh an inkaihhruaina te a sawifiah a. Mizoram thilsiam chhuah a tam thei ang ber TRIFED hnuaia ziahluh hi an duhthusam a nih thu a sawi.

He Mela hi Commerce, Industries, Geology & Mining Department, Tribal Cooperative Marketing Development Federation of India Limited (TRIFED), Ministry of Tribal Affairs, Government of India, DFO Branch MSME Aizawl teleh State Monitoring Unit, PM Vishwakarma te tangkawpin an huaihawt a ni a. He Mela-in a tum ber chu TRIFED te leh PM Vishwakarma hnuaia Mizoram artisan-te leh entrepreneur te insumdawntawn dan tur kawng hawn a ni.

TRIFED hian India ram pumpuiah outlet ‘Tribes India’ tih hming puin hmun 110 velah an nei a. An hnuaia inziaklutte aṭang hian an bungraw zawrh tur hi an lei khawm ṭhin a ni.

Mela-ah hian artisan 28 an tel a. Heng artisan-te hi TRIFED aiawh lo kalte nen inkawmna hun siamsak an ni a, an thilsiam chhuahte hi TRIFED outlet-a zawrh theih tur chi te a nih chuan TRIFED hnuaiah hian inziak lutin an thilsiam te an pho chhuak ve thei tawh dawn a ni.