1431/2022-2023

Champhai, the 1st August, 2022: Centrally Sponsored Scheme Prandhan Mantri Matsya Sampada Yojana (PMMSY) kaltlanga hamthatna dawngtu tur thlangtu, District Level Committee on PMMSY, Champhai District chu vawiin chawhnu dar 1 khan an Chairman Pu James Lalrinchhana, District Bawrhsap hovin DC Conference Hall-ah an thukhawm.

Bawrhsap Pu James Lalrinchhana chuan Champhai District chu Sangha thar tam thei tura theihna nei a nih thu sawiin, Sangha thar chhuah hmanga intodelh thei tur leh thawnchhuah thei tur khawpa tanlak a tul thu a sawi a. Mi nawlpui banphak Sangha thar leh tuihnai, man man zawk a awm theih nana tanlak a tul thu sawiin, Sangha no neihna hatchery tihhmasawn hmanga Sangha no intodelha bul kan tan phawt chuan Sangha thar chhuahah hma kan sawn ngei dawn a ni, a ti bawk.

He hunah hian Pu Lalhmunsanga, DFDO Champhai & Member Secretary, PMMSY District Level Committee chuan Pradhan Mantri Matsya Sampada Yojana (PMMSY) kalpui turin Sawrkar lamin senso za zela 60 leh mimalin senso za zela 40 an tum thin thu a sawi a. Sawrkar sen ngai atanga za zela 90 chu Sawrkar laipui tum tur niin, za zela 10 chu State Sawrkar tum tura tih a nih thu a sawi bawk.

He hunah hian Prandhan Mantri Matsya Sampada Yojana (PMMSY) 2021-2022 kaltlanga tanpuina diltu hrang hrangte dilna chu tehfung duan sa hmanga zirchianna neih a ni a. PMMSY kaltlanga hmalakna hrang hrang 7 hnuaiah hian diltu mi 449 an awm a. Heng zinga mi 247 te chu hamthatna dawng tura pawm an ni a. Heng zinga mi 100 te hi Dil thar siam tur, 41 te Rearing Pond, 100 te Paddy cum Fish Culture, Bio-floc Unit, Insuated Vehicle leh Freshwater Finfish Hatchery siamna dawng tur 1 theuh bakah mi 3 te Raceway siam nana hamthatna dawng tura thlan an ni.

Meeting-ah hian SBI Regional Manager Pu Rakesh Ravi, DLAO, DAO, LDM leh PMMSY DLC Member dangte an tel a. Champhai District-a Sangha tharchhuah tam theihna tura hmalak tulte leh rawtna awmte zau taka sawiho a ni.