No.7611/2020-2021

Vawiin hian Serchhip District ICDS Project in Pradhan Mantri Matru Vandana Yojana  (PMMVY) Best Performance Award, 2018 leh Best Implementation Award 2017-19 a lo dawn tawhte lawmna hun Serchhip Auditorium ah buatsaih a ni a, bawrhsap Pu Kumar Abhishek, IAS chu khuallian a ni.

Pu Kumar Abhishek chuan, National Award dawng thei khawpa an thawhrimna leh inpeknaah Serchhip ICDS thawktute fakin a lawmpui thu a hrilh a, PMMVY Scheme tobul tlangpui sawifiahin, chhungkaw tin tana nute hlutzia leh chhuan lo awm zel tur hrisel zawk min hrin sak theih nana nau an pai laia an mamawh eitur tha te, hahdamna te leh thil tul dang apiang pek a tul thu a sawi a, chutianga an mamawhte an hmuh theih nan chuan he scheme hi siam a ni a, nau an pai laia hna hahthlak thawk lova hahdam taka an awm theih nan leh an chawlhhahdam chhunga an sum lakluh tlahniam tur lo chhawk zangkhai nan he scheme hi a tangkai hle a ni, a ti. District chhunga PMMVY thawktute chu nasa zawka bei sauh sauh tura fuihin, an Project huam chhunga nu naupai tumah hmaih nei hauh lova hma lak tum tlat turin a chah a ni. Khuallian hian District PMMVY kalpui tawh china Anganwadi Workers thawk tha thlan chhuah mi pathumte hnenah lawmman a hlan nghal a, lawmman dawngtute chu; pakhatna Pi TC Lalnuntluangi, Thenzawl UPC Veng, pahnihna Pi C. Lalsangzuali, Field Veng Serchhip leh pathumna Pi C. Laltlankimi, Thenzawl te an ni.

PMMVY National Award dawn lawmna inkhawmah hian Pi Zoramthangi Chhangte, State Nodal Officer te, Pi Brenda Lalrindiki, State Project Coordinator ten thu an sawi bakah Pi F. Hmingthankimi, Serchhip District PMMVY Programme Coordinator chuan kum 2017 atanga Serchhip District a PMMVY hmalakna tlangpui sawifiahna a nei bawk a. PMMVY hi nu naupaite tanpuina Scheme niin Mizoramah kalpui a nih achin Serchhip district ah tun thlengin nu 2151 te tanpuina pek tawh an ni a, pawisa sem tawh zawng zawng zat hi Rs. 9490000 a ni.

Pu Lalbiakliana, CDPO Serchhip chuan kalkhawmte lawmna leh PMMVY Awards an dawn theih chhan tlangpuite sawifiahna a nei bawk.

He hunah hian District chhunga Anganwadi Workers te, PMMVY line departments te leh sawm bik mi thenkhat te an tel a ni.

Attachment

  • Loading attachment...