Mizoram Sorkar Vigilance Department chuan thuchhuah siamin, Police kut phuar tih chungchang a hnuai ami ang hian a sawifiah :

Tun hnaiah tualchhung Chanchinbu thenkhatin Party pakhat thuchhuah la chhawngin, Chief Minister in Police kut phuarsak leh an tihtur ang ti thei lova siama sawina a awm a. Thil awmzia chu, Pi Lalrinkimi, State Secretary, BJP Mizoram Pradesh in Superintendent of Police, Anti Corruption Bureau-a a lehkha thehluh, Minister leh MLA 9 in kum 2008 leh 2013 inkara an thil neih (asset) inanglo chungchanga First Information Report a thehluh atanga lo chhuak niin a lang.

Pi Lalrinkimi lehkha thehluhah hian kum 2008 leh 2013 inkarah Minister leh MLA te thilneih hlutzawng a pun tak avangin Anti Corruption Bureau hian chhui sela a ti ni berin a lang a. Pi Lalrinkimi lehkha hi Anti Corruption Bureau in an dawn hnuah Vigilance Department-ah a thawn chhawng a. Pi Lalrinkimi’n kum 2008 leh 2013 inkara  MLA 9 te thilneih (asset) hlutna pung chho ta hi, MLA vek te ina inthlan dawna an nomination lehkha an thehluha an tarlan a ni a; hei hi tlangzarh vek a ni a, aduh apiangina ena hriat theih tura pholan a ni.

Inthlannaa candidate ten an thil neih (asset) an pholan hi inthlannaah, a thlangtu tur ten tunge an thlan ang tih hriat theihna tur atana ruahmanna a ni a. Hetiang deuh tho hian danin educational qualification bituk a neilo chung pawhin candidate te hian an educational qualification an tarlan a ngai a. Dan hi Election Commission of India leh Association for Democratic Reforms and Peoples Union for Civil Liberties hmalakna atanga Supreme Court thuchhuak atanga hman tan a ni a, (Peoples Union for Civil Liberties  V Union of India, AIR 2003 SC 2363, (2003) for SCC 399).

Dan chu zawmin candidate ten "nomination an thehluh ruala anmahni chanchin an tarlan hi voter in a a mi rinzawng emaw, duhzawng emaw zalen taka a thlan theihna tura tih a ni a. Candidate ten an thil neih (asset) an tarlan hi voter tena ngaihdan an siam theihna tura tlangzarh a ni.

Anti Corruption Bureau hian inkaihhruaina, Government of Mizoram Anti Corruption Bureau Manual, 2012 a nei a, chu Manual ang chuan ACB hian complaint fumfe tak a awm a nih loh chuan, tawngpawng takin enquiry/investigation an ti ngai lova, an inkaihhruaina chu, he manual-a paragraph 21 ah a awm a, chu chu zui a ni.

Pi Lalrinkimi’n ACB-a a lehkha thehluh ah hian tumah malmanin thil diklo tia puh a nei lova, MLA candidate ten 2008 leh 2013 inkara an theil neih (asset) lo danglam ta chungchang a rawn sawi  a ni mai a. lehkha thehluh hi Vigilance Department in uluk taka a en hnuah ACB hmalakna tur chi-ah a ngai lova. Chuvangin Vigilance Department hian ACB pawh chutiang chuan a hriattir ta a ni. Lehkha thehluh hi Vigilance Department-a tawp a ni a, Chief Minister nena inkaihhnawihna a awm lova, Chief Minister hnenah file hi pek luh a ni lova, Chief Minister nena inkaihhnawihna  a awm lo.