Ni 14th June 2018 khan a hnuaia mi ang hian Police PRO & Addl SP Aizawl District ni bawk chuan ‘Police Press Statement’ a siam :
1. MI BUM CHING MAN A NI : Ni 13.6.2018 (Nilaini) khan Vaivakawn Police station staff te chuan mi bum ching vai pakhat, MD. Ala Uddin (26) s/o Abdul Mannan of Patharkandi, Karimganj District, Assam chu Seventh Day Tlang atangin an man a. Ani hian mi tam tak bum tawhin Police ten ngawrh taka an zawn hnuah vanneihthlak takin man chhuah a ni ta a ni. Mi a bum dan tlangpui chu, In sa mekte hnenah kalin insakna bungrua, brick leh balu te tlawm zawka pe theia insawiin a zawrh thin a, anniin an lo order ta thin a. Tichuan, Ala Uddin-sa hian Brick/Balu zuartute hnenah hralhna a hmuhsak thu sawi lehin an pekna tur a hrilh ta thin a. Brick/Balu neituten an pek veleh Ala Uddin-a hian a man/pawisa chu midangte (taxi driver-te) tirin a lo lak khalh ta thin a ni. Taxi driver-te hi an taxi hman sakin an phone number te a dil a, a hnuah hlawh neiin pawisa chu a lak tir ta thin a ni. Brick/Balu neituten pawisa an hmuh tak loh avang leh a leituten an leina pawisa an pek tawh bawk si avangin an buai ta thin a. Police-ah report-in nasa taka zawn a ni a, bum chhuah a nih hnuah vanneihthlak takin man a ni ta a ni. Tunah hian Vaivakawn PS-ah Inbumna, Cheating Case pathum (3) siamsak mek a ni a, chungte chu Vaivakawn PS C/No.94, 96 & 97 of 2018 dt.13.6.2018 u/s 420 IPC a ni. Midang a bum tawhte pawh zawn belh a ni a, a tul dan azira case dang pawh siamsak zel a ni ang.
2. AIZAWL POLICE TE HMALAKNA : Aizawl khawpui chhung a lo ralmuan zawkna tur leh sualna hrang hrangte tihtlem/ven a nih theihna tur atan Aizawl District Police te chuan Veng hrang hrangte tlawh kualin chhun leh zanah te khawlai leh hmun pawimawhte patrolling-a fankual thin a ni a. Kawngpui dung leh vantlang hmunah te zu leh ruihhlo dangte ualau taka ti thin te, mipui nunau, naupangte tana hmuh nuam lo khawpa khawsa te pawh vai a man thin a ni a. Hengte hi khawpui ralmuanna leh ruk ruk venna atana thil pawimawh tak a ni. Hemi chungchangah hian mipui vantlang leh tlawmngai pawl hrang hrangte pawh Police hmalakna tha taka min thlawpna leh puihnaah kan lawm a, tha taka thawkho zel tur pawhin kan insawm bawk a ni.
Tin, karleh ni 18.6.2018 atang hian Aizawl Veng hrang hrangte Police Officers (GOs) kaihhruainain tlawh a, khawtlang hruaitute, VC/LC/YMA, etc leader-te nen inhmelhriatna leh sualna hrang hrangte do tura thawhhonate sawiho turin fehchhuah tum a ni a. Zan khatah Veng pahnih-pathum emaw tlawhin Veng/khawtlang hruaitute tlawhchhuah tum a ni. He kan hmalak tumna hrang hrangahte hian mipui leh khawtlang hruaitute puihna kan ngen a, tha taka kan thawhho kan beisei a ni. Kan khawpui a lo ralmuan a, sualna hrang hrangte kan ven a, kan tihtlem theihna turin theihtawp i chhuah tlang ang u.
