No.4084/2021-2022

Aizawl, the 23rd February 2022:  State Institute of Rural Development & Panchayati Raj (SIRD&PR), Mizoram leh National Commission for Women, New Delhi tangkawp chuan Aizawl Municipal Corporation (AMC) Ward I - VIII huam chhunga Local Council member hmeichhia te tan ni thum (23 – 25.2.2022) chhung awh tur “Capacity Building Programme on ‘She is a Change-Maker’ for Women in  Politics” a buatsaih a. He training hawnna hi vawiin khan SIRD&PR, Durtlang Leitan-ah neih a ni a. He hunah hian Pi Lallawmchhungi, Chairperson, Mizoram State Commission for Women chu Khuallian niin, Pu A. Asholi Chalai, Joint  Secretary, National Commission for Women, New Delhi chu Khualzahawm a ni.

Khuallian Pi Lallawmchhungi chuan Local Council member hmeichhe kalkhawmte chu veng tana thlantlin an nih avanga an pawimawhna leh hlutna te a sawi a. A bikin hmeichhia te tan harsatna leh  buaina chinfel puitu leh tanpuitu tangkai tak an ni thei a ni a ti. Hmeichhia te chu mipa te ang thoa theihna nei, khawtlang leh ram tana hmasawnna kawnga thil thlak danglam theitu an ni tih a sawi bawk a ni.

Khawvel ram hrang hrang ten hmeichhiate chawikan leh tih hmasawn a tulzia hriain nasa takin hma a la tih a sawi a. Tun  tum training training chhimtute chu uluk taka training chhunga mithiamte zirtirna ngaihven tur leh hlawk tak nei turin duhsakna a hlan bawk a ni.

Khualzahawm Pu A. Asholi Chalai chuan hmeichhiate chu khawtlangah leh politics-ah pawh hmahruaitu in ni thei a. He training pawimawh tak hian training chhimtute chu nasa takin hma a ti sawn leh zual ngeiin a beisei thu a sawi a ni. 

Training hawnna hun hi Pu Lalhmunsanga Hnamte, Director, SIRD&PR in a kaihruai a. Sawm bikte atangin Pu Lalrinenga Sailo, Mayor, AMC leh Pi Vanlalpianpuii, Director, Women & Child Development te pawhin thu an  sawi bawk a ni. Pu H. Rosangpuia, Course Director/ Faculty (RD/PA), SIRD&PR chuan training neih dan tur tlangpui leh an zir turte sawiin, Pu Khawlsiamthanga Khawlhring Associate Professor, SIRD&PR chuan lawmthu sawiin training hawnna hun hi a khar a ni.

He Training-ah hian AMC Ward I – VIII huamchhunga Local Council member hmeichhia 39 an tel a. Mithiam hrang hrang ten kalkhawmte zirtirna an pe dawn a ni.