2032/2023-2024

Khawzawl 27th. September, 2023 : Vawiin chawhma dar 11:00 khan PM Poshan Wing, Khawzawl District bultumin Govt. Middle School - II (2), Khawzawlah Cooking Competition for Cook-cum-Helper under PM Poshan, Khawzawl District chu buatsaih a ni a, hetah hian Khawzawl khawpui chhunga PM Poshan kalpuina Sawrkar School 12 a Cook-cum-Helper te an intihsiak a ni.

Cooking Competition hawnna pual hian inkhawm tawi buatsaih a ni a, he hun hi Khawzawl DEO kal chhuak tur Pu Lalsikula chuan a kaihruai a. Thu tawi sawiin Pu Lalsikula chuan Sawrkarin naupang te tana chaw chhun a buatsaihsak, naupangte ei tura siamsaktu Cook leh Helper te tana ei insiamsiakna buatsaih a ni chu lawmawm a tih thu a sawi a, Cook leh Helper te chu naupangte ei tur chaw chhun an buatsaihsaknaah faina leh thianghlimna ngai pawimawh a, naupangte ei tur chaw hrisel tak buatsaihsak tum turin a chah a. Vawiina intihsiakna chuan naupangte chaw chhun an buatsaihsak leh zelna turah chona siamsakin, Cook leh Helper ten hmasawnna neih phah se a duhsak thu a sawi bawk.

Pu Lalchhuanthanga Renthlei, Coordinator, PM Poshan in Report pe in Khawzawl District chhungah hian Zirna In 77-ah PM Kishan kalpui a nih thu leh heng Zirna In 77 zinga 40 chuangin Kitchen Garden an nei tih a tarlang a. Hei bakah hian vawiin Cooking Competition-ah hian Khawzawl khawpui chhunga PM Poshan kalpuina School 12 atangin Cook leh Helper te an tel vek thei tih a tarlang bawk.

Hemi hnu hian intihsiakna kalpui zui nghal a ni a, Intihsiakna hi Judge 4 - CDPO Pi Lalremthangi, ADAO Pi Hmangaihthangi Renthlei, Dr. Melody Lalmuanpuii leh Pi Lalhruaitluangi, Program Assistant, KVK Khawzawl ten an endik a ni.

Intihsiakna neih zawhah lawmman semna neih zui nghal a ni a, Pu Lalthlanthanga, Headmaster, Govt. M/S-II kaihhruaia Cooking Competition kharna hun buatsaihah hian Pi Lalhruaitluangi chuan Result a puang a. Cooking Competition-ah hian lawmman dawngtute chu :-

1. PC Zorammawii, Govt. Khawzawl PS-IV
2. Lalnunsangi, Govt. Khawzawl PS-III & Ngurkhumi, Govt. LF PS
3. Lalremruati, Govt. Kawnzar PS & Bancy Laltlanhlui, Govt. LF MS
te an ni.

Pu JH. Rodawla, Head Assistant, District Project Office, Samagra Shiksha in lawmthu sawina neiin hun hman tih tawp a ni.