Tukin zing khan Social Welfare Department buatsaihin hriselna lama hmasawnna tura kawngzawh ‘Poshan Rally on National Nutrition Month’ (Rashtriya Poshan Maah) Vanapa Hall atanga Millenium Centre thleng neih a ni a, Social Welfare Minister Pu P.C.Lalthanliana leh Health Minister Pu Lal Thanzara ten an hmanpui a. Thupui chu ‘Eat Healthy, Healthy Nation’ tih a ni.

Social Welfare Minister Pu PC Lalthanliana chuan Poshan Abhiyan (National Nutrition Mission) hi kumin March Ni 8 khan Prime Minister zahawm tak Pu Narendra Modi an a tlangzarh a, a thiltum ber chu naupang zinga thanthu, eichhiat vanga tlakchham-natna vei, nau pianghlim buk zang lutuk leh thisen sen tlakchham tihtlem a ni, a ti a. India ramah hian naupang thang tha lo hi 38.4% an awm a, Mizoramah chuan 28% a ni, a ti a. Naupangte an than a thutna chhan hi chaw an ei that tawk loh vang a ni tih hmuhchhuah a ni a, Poshan Abhiyan hnuaiah hian uluk lehzualin naupangte hriselna endik a ni dawn a ni, a ti a. Uluk taka naupangte than dan endik nan khawl hrang hrang sanzawng tehna ( Stadiometer), nausen seizawng tehna ( infantometer), rihzawng tehna ( mother and child weighing scale) Anganwadi Centre-ah pek vek a ni dawn a ni, a ti a. He mission atana thawk tur hian mi 59 lak tawh niin Anganwadi hnathawkte pawh an hna awlsam zawk nan smart phone pek vek an ni dawn a, pekchhuah theih turin buatsaih mek a ni, a ti. Social Welfare Minister chuan mission hian naupang bakah nu naupai te, naupawm te, tleirawl zingah te thisen sen tlakchhamna tih tlem a tum a ni, a ti a. Poshan Month hman chhung hian department hrang hrang atangin thawhhona a tha a, mipui te, NGO te, Local Council te nena thawhho a pawimawh hle a ni, a ti.

Health Minister Pu Lal Thanzara chuan September thla pum hi Rashtriya Poshan Maah (National Nutrition Month) atana hman a ni tiin hemi thla chhung hian village level, block level, district level leh state level-ah nasa takin hma lak a ni, a ti a. Nutrition month bik chu kan hmang zo dawn ta a, hemi thla chiaha hmang lovin department hrang hrang leh mipuite kan tan tlan zel a ngai a ni, a ti a. Nutrition Month in a tum zinga langsar zualte chu- thlaruk chhung nu hnute chauh nausenin a hne tur a ni tih leh nausen thlaruk a tlin china chaw tha dang pek belh chungchang te, thisen sen tlakchham tihtlem te, uluk zawka naupang thandan endikna te, hriselna leh thianghlimna chungchang te a ni a, heng thupui hmang hian inhrilhhriatna buatsaih thin a ni, a ti.

Integrated Child Development Services (ICDS) chuan kumtin September Ni 1-7 hian ‘Nutrition Week’ an huaihawt thin a, tunkumah hian September thla chhungin ‘Nutrition Month’ hman a ni a. March Ni 8, 2018 atang khan India ramah National Nutrition Mission ‘Poshan Abhiyan’ kalpui tan a ni a. Kum 2019-ah chuan Mizoram chhunga district zawng zawng tuam vek tum a ni. National Nutrition Mission ‘Poshan Abhiyaan’ hnuaiah hian Community based Education-Anganwadi Centre tinah khawtlang mipuite zirtirna pek a ni a, thupui hrang hrang awmin CDPO hnenah semchhuah tawh a ni. Mission hi kum 2022 thleng awh tur a ni.    

Vanapa Hall kawtah hian tan a ni a, Social Welfare Secretary Pi K. Vanlalrawni chuan kalkhawmte lawmna thu leh rally chungchang sawi hawnna a nei a. Poshan Abhiyaan Brand Ambassador Pu S. Malsawmtluanga atangin thusawi ngaihthlak a ni a. Hemi hnu hian kawngzawh a ni. Millenium Centre kawtah programme hi chhunzawm niin Social Welfare Director Pi Laldikkimi chuan lawmthu sawina in hun a khar a ni. Social Welfare Department hotute leh hnathawkte, Health Department hotute leh hnathawkte, National Health Mission hotute, Anganwadi worker te, Health worker te, sikul naupang te an tel a ni.