4235/2023-2024
Champhai, the 18th March, 2024: Kan hma lawka General Election to Lok Sabha, 2024 neih tur atan District Election Officer, Champhai District Pu James Lalrinchhana chuan Postal Ballot hmanga vote thlak thei chinte leh hmalak dan tur hriattirna vawiin khan a chhuah.
Thuchhuahin a tarlan dan chuan General Election to Lok Sabha 2024 atan Conduct of Election Rules, 1961-in a phal angin a hnuaia tarlante hian Postal Ballot hmanga vote thlak an dil thei ang:-
i) Senior Citizen (AVSC) - kum 85 leh a chunglam.
ii) Person with Disability (AVPD) - Social Welfare Department-in 40% benchmark disability certificate a pekte
iii) Covid 19 suspect or affected (AVCO)
iv) Person employed in essential services (AVES) - Election Commission-in essential service a puante.
Form 12D hmangin dilna an thehlut tur a ni a. Dilna form hi March 21, 2024 thleng DC Office, Keifangtlangah lak chhuah leh thehluh theih a ni.
A chunga tarlan no. (i), (ii) leh (iii) -te hi BLO-ten mahni booth-ah theuh engzat nge awm tih March ni 20, 2024 ral hmain Election Branch, DC Office, Keifangtlangah hriattir tur a ni a. Form 12D lain an booth-a hetiang mi zawng zawngte hnenah hian sem tur a ni. Form 12D an pekte hnen atangin acknowledgment/receipt lak ngei tur a ni a. Postal Ballot hmanga vote thlak duh an awm chuan Form 12D felfai taka fill up chu Election Branch-ah March ni 23, 2024 aia tlai lovah thehluh tur a ni.
Essential Service Category-te hian Form 12D hmangin dilna an theh lut thei a. An dilna Form 12D ah an Department/Organization Nodal Officer-in, election ni-ah duty an nei tih hriatpui nan a counter-sign ngei tur a ni a. March 21, 2024 aia tlai loah dilna hi thehluh tur a ni.
