3602/2024-2025

Aizawl the 18th December, 2024 : Power & Electricity Department, Govt. of Mizoram hnuaia Mizoram State Load Despatch Centre (SLDC) chuan India ram pum huap intihsiakna, Grid India leh Forum of Load Despatcher (FOLD) in a buatsaih, Emerging LDC Category ah 4th LDC Excellence Awards 2024 lawmman pakhatna a dawng.

Power Minister Pu F. Rodingliana chuan he lawmman dawn a nih theihna tur a rim taka thawktu zawng zawng te chungah lawmthu a sawi a, ram leh hnam tan theihtawp chhuah chhunzawm zel turin duhsakna a hlan bawk a ni.

Lawmman hlanna hi 23rd National Power System Conference, IIT Indore a neihah, 14.12.2024 khan buatsaih a ni a. Power & Electricity Department aiawhin Er. H. Zonunsanga, Engineer-in-Chief in lawmman hi, Central Electricity Authority (CEA) Chairman Shree Ghan Shyam Prasad hnen atangin a dawng a. Engineer-in- Chief hi SLDC Officer leh staff ten an tawiawm a ni.

He intihsiaknaah hian India ram pumpui chu Category thum (3) ah then niin, Emerging LDC Category (State leh UT 13 awmna) ah lawmman pakhatna 4th LDC Excellence Award 2024 hi Power & Electricity Department Mizoram SLDC hnenah hlan a ni ta a ni. Kum 2023 khan Power & Electricity Department Mizoram SLDC hi Top three (3) ah an lo in hlang kai tawh bawk a ni.

State tin a LDC ten Power Source an neih an hman tangkai dan te, Power Market an hman tangkai dan te, State Capital tan a Islanding Scheme an ruahman dan te, Grid Stability maintain na tur a Automatic Demand Management System (ADMS) leh Under Frequency Relays (UFR) an hman dan te, Cyber-Security atan a invenhimna an neih te leh thawktute hmasawn zelna tur atana Training an bawhzui dan te hmanga intihsiakna hi neih a ni. Heng bakah hian Interview leh Presentation hmanga intihsiakna neih a ni bawk.