No.3368/2019-2020
Khawvel ram pumin a buaipui, COVID-19 vanga chhungkaw tin pawn chhuak lova kan-in kharkhip lai hian Power Supply mamawhna a sang dawn hle a, Power & Electricity Department chuan mipui ten he hun khirh tak chhunga power lama harsatna an tawh loh nan theih tawp a chhuah a ni.
Hripui leng mahse P&E Department Officer leh Staff te chuan hrileng laka fimkhur thei ang berin an hna chanpual an thawk reng dawn a, mipuite rilru thlamuang taka lo awm turin P&E Department chuan a ngen a ni.
Electric vanga harsatna nei te chuan SLDC Control Room Ph : 03892322174 ah hrilh hriat tur a ni a, he number be pawp thei lo te chuan mahni bialtu JE/SDO te hnenah hrilh turin mipuite a hriattir a ni.
Boruak rit tak hnuaiah harsatna te a theih chen chen chinfel zel tum a ni a, nimahsela duhthusam tih hlawhthlin theih lohna hmun a awm palh a nih pawhin mipuiten lo hrethiam hram hram turin a ngen a ni.
Electric duty rawn kal reng reng te nen Sawrkar duh dana inhnaih chilh lo turin P&E Department chuan mipuite a ngen a. Emergency thil nilo leh electric bill chungchang erawhchu tun dinhmunah complain lo turin a ngen bawk a ni.
Mipui him zawk nan electric bill counter khar a ni a, electric bill sem dan a rualkhai zawk nan online-a pekna pawh tih tawp lailawk a ni, hun ralmuan veleh bill hi a hlawma pek mai turin ruahmanna siam a ni ang.
Damdawiin mamawh leh Tui pump na tura power hnianghnar zawk pek a nih theih nan chhung tinin current hmang tlem a, oven, geyser etc. hmang tlem turin P&E Department chuan a ngen bawk a ni.
Ram pumin harsatna a tawh laia Power supply-ah buaina Mizoram in tawh loh nan control room duty te leh line a thawk zawng zawng ten mipui tawiawmna a ngen a, emergency-ah electric duty ten rang taka hna an thawh theih nana lirthei veivah kawngah local task force member zawng zawng te tanpuina ah lawmthu P&E Department chuan a sawi a ni.
Hrileng, COVID-19 karah loh theih loha mahni in chhuahsana mipui tana thawktute tana min tawngtai pui turin mipuite Department chuan a sawm bawk a ni .
