No.5016/2020-2021

Aizawl, the 12th September 2020 : Vawiin khan Power & Electricity Minister Pu R. Lalzirliana Tawi bialtu MLA ni bawk chuan MLA Fund atanga Maruti Suzuki siam ECCO Ambulance thar a lei chu Thingsulthliah PHC a damlo mamawhtute hman a tan Thingsulthliah PHC Medical Officer Dr. Vanzarliani hnenah a  hlan.

Ambulance thar hlanna inkhawm tawite Damdawiin tuala neihah Pu R. Lalzirliana chuan thu sawiin kuminah hripui a leng avangin MLA Fund chu tum dang leh kum dang anga mipui mamawh ngaihtuah chunga inhlawhna siam te, khaw bil mamawh leh cheibawl nana hman a inthlahrunawm thu a sawi a. Hripuiin khawvel pum a nuai avangin sum awm ang angte chu hripui dona kawngah a tul apiang lei nan te hman tangkai a tha tiin  chumi ngaihtuahna nei chunga Thingsulthliah PHC mamawh Ambulance thar chu MLA Fund atangin a lei tih a sawi a. Hei hi bial mipuiten an hriathiam a duh thu a sawi a. Ambulance thar chu Thingsulthliah tlangdung a khaw hrang hranga a mamawh apiang ten tangkai taka an chhawr ngei a beisei tih a sawi bawk a ni.

Pu R. Lalzirliana chuan Thingsulthliah chu Aizawl District chhung anih avangin SIRD hmun leh JNV School te chu Aizawl District-a Covid veite enkawl nan loh theih loh avangin hman a tul tiin hengah te hian mipuite chiai lo turin a ngen a. A tul chuan Saitual Jail hmun pawh Covid veite enkawl nan hman a rem riaua a hriat thu a sawi lang a. Hmarchhak mai ni lo India ram pumah Covid avanga boral awm lohna state awm chhun kan ni a, hei hi Pathian min venna leh mipuite bang lova an tawngtaina rah a nih ngei a rin thu sawiin Kohhran hruaitute leh mipuite chu tawngtai zel turin a chah a. Hripui lakah kan him zel theih nan leh a darh zel loh nan mipuite kawng engkimah fimkhur turin a chah bawk a ni.

Task Force inpekna chungchang sawiin Minister chuan thla tam tak mahni in lum pawh luah hman lovin ramri ven lamah leh hripui dona kawngah an hun pum an hmang a, kan mangan lai taka Mizo nihna an lan tir hi a ropui a, an inpekna angte hi khawvel hnam dangteah sawi tur a awm lo a ni, a ti.

Dr. Vanzarliani leh khawtlang hruaitute he huna thusawi te chuan Pu R. Lalzirliana'n  khawtlang mamawh a tul apiang a tih saknaah lawmthu sawiin PHC tana Generator alo pek tawh pawh tangkai taka hman a nih thu an sawi lang a ni.

Ambulance thar hi nuai 6 man bawr niin Partial Lockdown avangin a Registration te la tihfel loh a ni a, mahse mipui mamawhna a san tawh avangin vawiin khan hlan a ni.

Pu R. Lalzirliana hian MLA Fund atangin Covid-19 do nan cheng nuai 50 a lo thawh tawh bawk a ni.