No.3286/2020-2020

Vawiin khan Power & Electricity Minister leh Bialtu MLA ni bawk Pu R. Lalzirliana chu khuallian niin, Mizoram Cooperative Apex Bank Ltd., Keifang Branch, Saitual District a hawng. Hawnna inkhawm hi VFDC Hall, Keifang-ah neih a ni.

Khuallian Pu R.Lalzirliana chuan thu sawiin,
Mizoram Cooperative Apex Bank Ltd., Keifang Branch, Saitual District hawnna a Board of Directors ten an tawiawm thei chu lawm awm, a ti a. Apex Bank Branch thar chu Keifang khaw mipui tan leh a chhehvel tlangdung a cheng ten an chhawr tangkai a beisei thu sawiin, tun hnaiah Apex Bank-in hmasawnna neia a kal chho zel chu lawmawm a ti bawk a ni. Minister chuan Apex Bank chu Mizo te Bank, Mizoram mipui tana ding a nihna anga, mipuite rawngbawl tura hmasawn zel turin duhsakna a hlan a. Minister chuan mi rinawm, taima tan bank chu pawisa thawhchhuah tlem lua awmlo a dahkhawlna, eizawnna atan leh lei rem rahna atan loan lak theihna a nih avangin, mitam tak tan malsawmna thlentu a ni, a ti a. Minister chuan Mizoram chhunga Kohhran hrang hrang sanghnih chuangin Mizoram Cooperative Apex Bank Ltd. atangin Kohhran Loan an lo la tawh a ni, a ti a. Mizo mipuite'n Mizoram Cooperative Apex Bank chu mizo te bank a ni tih hre nawna a, mahni bank chawikanga, account pawh a tam thei ang ber hawnga hmang tangkai turin khaw mipuite a sawm a ni. Khuallian chuan Bank hlawhtling tur chuan thawktu rinawm a pawimawh a, biak nuam leh mi tana inpe te chuan mi an hip a ni, tiin thawktute a fuih nghal bawk a ni.

Minister Pu R.Lalzirliana hian Mizoram Cooperative Apex Bank Ltd., Keifang Branch Office hnuaia ATM Booth a hawng nghal bawk a ni.

Minister hi Pu V.L Hruaizela, Saitual DC chuan lo dawngsawngin, MCAB Ltd., Keifang Branch hawnna hun hi Pi T. Lalmuanpuii, Chairman, MCAB Ltd. in a kaihruai a, Rev. C.Lalramnghaka, Mizoram UPC, Keifang Bial chuan hunserh hmangin, he hun hi Pathian hnenah a hlan a. Pu Lalzuahliana, Chief Executive Officer, MCAB Ltd. chuan lawmthu sawiin he hun hi a khar a ni.

Minister hi Pu T.C Pachhunga, Vice Chairman, Sports, Youth Affairs & Tourism Development Board leh Pu Rochhunga Ralte, Vice-Chairman, Land Revenue & Survey Board leh midangten an tawiawm a ni.

Mizoram Cooperative Apex Bank Ltd., Keifang Branch, Saitual District- hi Branch 21-na a ni a. Apex Bank hian tunhnaiah kawng hrang hranga hmasawnna neiin, kum 10 chuang zet an hlep pawh a thang (skewed) chho zel a ni. Tunah hian hnathawktu nghet 159 nei mekin, thawktu zawng zawng hi mizo vek an ni a. Keifang Branch, Saitual District hawn a nih hnu hian Mizoram District tinah branch an nei ta a ni. Nimina account hawnna 'trial run' an neih tling khawm hi cheng nuai khat leh singa chuang a tling a ni. Thawktu staff mi pathum awmin bul an tan dawn a ni.

Mizoram Cooperative Apex Bank hi CBS hmanga kalpui mek niin, Mizorama Bank awm zawng zawng zinga mahni puala Data Centre nei Bank awmchhun a ni a. ATM/Rupay Card a pek theih bakah, eng bank-ah pawh RTGS/NEFT hmangin rang takin pawisa a thawn theih reng a ni. Sawrkar atanga hamthatna account kaltlanga dawn chi, gas subsidy leh thildang DBT (Direct Benefits Transfer) scheme hnuaia thil hrang hrangte hi Apex Bank hmang hian awlsam taka tih theih a ni. Apex Bank-ah hian Nitin Deposit/Pigmy Deposit Rs 20/- aia tlem lo, mahni inah, dawrah, hnathawhna/office atanga dah theih turin agent-in a khawn thin a ni.

Apex Bank-a sum dah tute tan Life Insurance chi hnih PMJJBY leh PMSBY a tih theih a. PMJJBY hi kum khatah Rs 330 pekin thih hnuah cheng nuai hnih, hamthatna a dawn theih a ni. PMSBY-ah hian kum khatah Rs 12 chauh dahin accident-ah cheng nuai hnih hamthatna a dawn theih bawk a ni. Saving Account nei kum 18-40 te tan pension scheme Atal Pension Yojana a zawm theih a ni. Apex Bank hian Mizo mipuite eizawnna ngialnghet an neih theih nan leh nitin an khawsak inrelbawlna lama hma an sawn zel theihna turin loan chi hrang hrang- agriculture loans, allied agriculture loans, business loans, industry loans, housing loans, kohhran loan, road transport operator loans, personal loan, private car & two wheeler loans, demand loans leh loan dangte a pe chhuak mek a ni.

Apex Bank hlawkna leh hamthatna awm thei zawng zawng hi Mizo mipuite sum mamawh phuhruk nan puk tir thin a ni a, deposits za zela 70 lai a puk tir tlangpui a, amaherawhchu, Covid-19 hripui len avanga lockdown chhung chuan za zela 64 vel puk tirin, lockdown chhungin loan pending an nei lo a ni.