2057/2023-2024

Vawiin khan Pu R. Lalzirliana, Minister, Power & Electricity Department etc chuan Thenzawl ram Phivawk tlanga Solar Power plant siamna hmun tura ruahman a tlawh a. Hemi hnu hian Thingsulthliaha 132/33kV sub station bunna tur a hmunah a tlawh nghal bawk a ni.

He Solar plant hi NABARD Loan Cheng vaibelchhe 74.82 senga siam tur niin, kawlphetha 10 MWp pe chhuak thei tur a ni dawn a. Nizung chakna hmanga kawlphetha siamchhuahna Grid Connected Solar SPV Power Plant hi kum 2 chhunga thawh zawh tum a ni. Power Minister Pu R Lalzirliana chuan Power and Electricity Department hotute hruaiin Solar Plant panna tur kawng laih thar dan tur leh a hmuna 132 kV sub station bunna hmun turte a en a, ruahmanna a siampui a ni. Phivawk tlanga Solar power plant siamna tur hmun hi 30 bigha vela zau niin, solar plant bik hnathawktu tur contractor pawh thlan fel a ni tawh a. A panna kawng laih leh 132 kV sub station bun hna hi department in an thawk dawn a ni.

He power plant hi siam zawh a nih hun chuan he plant atanga kawlphetha siamchhuah chu state ta tur liau liau a ni dawn tih Power Minister chuan a sawi a. Kawlphetha hi mitin mamawh, a loa awm theih loh a nih avangin Power Supply hnianghnar neih hi kan mamawh em em a, sawrkar chuan kawng hrang hranga tan lain, Thenzawl bakah hian Sumsuih ramah 5 MWp Solar Plant thar bun tura ruahman mek a ni bawk a ti.

Minister hian Thingsulthliah hmuna 132/33kV sub station hmun tur pawh a tlawh nghal a. Special Assistance hnuaiah cheng nuai 300 hmanga he hna hi thawh tur a ni dawn a, fund allocation hmuh tawh niin Expenditure sanction dil mek a nih thu a sawi. He sub station ah hian Aizawl- Lunglei 132kV line awmsa hmangin Thingsulthliah khaw bulah power lak luh ani anga, 33kV level in chhim leh hmarah power pek chhuah anih tur thu a sawi bawk. Hna hi thawh tan tawh niin sub station levelling hna thawh zawh tawh a ni a. Hna hmabak pawh chak taka tan chhoh tur a nih thu a sawi bawk.

Pu R Lalzirliana hi Er. Lalhmingliani Hmar, Engineer-in-Chief, P&E Deptt; Er. Lalzorama, Superintending Engineer, Works - I, P&E Deptt;

Er.R Lalrinkima, Superintending Engineer, Project Circle - II, P&E Deptt bakah sawrkar mi pawimawh dang ten an tawiawm a ni.