No.6078/2020-2021

Power Minister Pu R.Lalzirliana chuan vawiin chawhnu khan 110kms a thui 132 KV S/C Line Aizawl (Melriat Sub-Station) to Lunglei (Khawiva Sub-Station) chu Melriat-a 132 KV Sub-Station hmuna programme buatsaihah a hawng. Pu Rochhunga Ralte, Vice Chairman Land Revenue and Survey Board leh Pu TC Pachhunga, Vice Chairman Mizoram Tourism Board ten Minister hi an tawiawm a ni.

Pu R.Lalzirliana chuan kawlphetha (power) chu reilote pawh a tellova kan awm theih loh a ni a, COVID-19 boruakah phei chuan mipui leh sawrkarin power an mamawhna a nasa lehzual, a ti a. Thawktu indaih lohna nasa tak karah P& E Department-a thawktuten theihtawp chhuaha hma an lak avangin vawiin hi kan thleng thei a ni, a ti. He project ti puitling tur hian Sabual leh Darlung tlang dungah hrui thlun phei niin ramhnuai pilril leh kham kar chhengchhe tak tak paltlangin hmun tam takah mimal ram paltlang a ngai tiin Power Minister chuan vawiina 132 KV line thlun hautakzia a sawi a. Kilometre 110 zeta thui hrui thlun nan hian tower hmun 252 ah phun a ngai a ni, a ti. Minister Pu R.Lalzirliana chuan thawktute thawhrimna avanga hetiang taka line pawimawh thlun fel a ni chu lawmawm a ti a. P&E Department a thawktu zawng zawngte fuihin taimakna nen, he ram tan leh mipui tana thawk an nih inhre thar a, mipui tana theihtawp an chhuah chu Pathian rawng an bawlna a ni tih hre thar leh turin a fuih a ni.

132 KV line thar hian chhim lam power supply pekna line awm tawh sa a chhawk zangkhai mai ni lovin Zuangtui, Bukpui, Khawiva, Melriat leh Luangmual Sub-Station leh line ah te harsatna a lo awm palh pawhin Zuangtui emaw Melriat Sub-Station atang tein Serchhip leh chhim lam tan power supply a pek theih dawn a. Hei hian nasa takin power supply khailak tur a ti ziaawm dawn a ni.

Lunglei, Lawngtlai leh Siaha District pathumte hian power supply hi Aizawl Zuangtui Sub-Station atangin Serchhip Bukpui Sub-Station leh Khawiva Sub-Station kaltlangin an hmu a. He line hi a hlui tawh avangin enkawl a hautak a, rei tak tak power supply khaihlak chang a tam hle. Chumi chhawk nan chuan 132 KV S/S Melriat -Khawiva line siam hna chu P& E Department chuan a thawk ta a ni.

He Project hlut zawng hi cheng nuai 4498.06 a ni a. DoNER Ministry atangin cheng nuai 3758.45, state matching share (Mizoram Sawrkarin a do letin) cheng nuai 417.61 leh SEDP sum cheng nuai 322 hman a ni.

Vawiin programme hi Power & Electricity Department Commissioner and Secretary Pu Biaktluanga’n a kaihruai a, Chief Engineer (SO) Er.Vanlalrema’n technical report a pe a. Er. Lalduhzuala Sailo, P&E Engineer-in-Chief in lawmthu sawiin hun hnung a khar a ni.