723/2025-2026

Aizawl dated 3rd June 2025: Tunhnaia ruah sur nasa avanga Mizoram hmun hrang hranga kawlphetha pekna chhia siamthat hna thawh mekte dinhmun thlirhona chu Power & Electricity Department Minister Pu F Rodingliana ho in P&E Department officer-te nen Minister office chamber-ah neih a ni a. He hunah hian District hrang hranga Power line chhia thawmthat mekte enho niin, tun dinhmunah 33kV North Bukpui Sub Station tih loh chu Sub-Station zawng zawng atangin power an dawng kim tawh a, North Bukpui Sub-Station pekna line pawh endik mek a nih thu tarlan a ni a. Hun reiloteah power pekchhuah theih beisei a nih thu sawi niin khaw thenkhat power supply pekchhawnna feeder thenkhat line chhia awmte pawh a tahtawlin siamthat mek zel a nih thu an sawi.

Distribution transformer chhiate pawh thlak mek zel a ni a, vawiin hian transformer 5 pekchhuah thu tarlan a ni a. Aizawl khawpui bikah khaw chhia leh harsatna dang a awm loh chuan ni 4, June, 2025 Nilaini ral hma hian power pek kim theih beisei a ni.

Chawnpui Sub-Station atanga Aizawl West lama power pekna, a bikin Dinthar Veng, Tuikual leh Dawrpui Vengthar chawmtu line, tunhnaia chhe zing bik chu tih ziaawmna turin a ranglama hmalak tura rel a ni a. Hna hmasa ah feeder pumpui shutdown lak ngai lova a chhe lai te thliar hran zung zung theihna turin Line Gang vuah ni se tiin rel a ni bawk.

Hetihlai hian Union Power Minister in P&E Minister Pu F. Rodingliana hnena nikum August ni 5-a a lo tiam tawh angin, Zuangtui leh Bukpui inkar 132 KV line load tam zawk keng thei HTLS conductor-a thlakna tur leh Mizoram chhung hmun hrang hranga Sub-station 7(Bawktlang, Saitual, Melriat, Khawzawl, Champhai, Serchhip Bukpui, East Lungdar) Transformer lian zawk dahna tur cheng vaibelchhe 47.87 chu DONER in an rawn pekchhuak tawh thu tarlan a ni a. He project hi zawh a nih chuan Zuangtui leh Bukpui(Serchhip) inkar a 80MW chauh load la thei thin kha 200MW thleng load an la thei toh dawn a ni. Hei hi Saitual District, Khawzawl District, Champhai District leh Serchhip District ten an tangkai pui hle dawn a ni tih Minister chuan a sawi a ni.