No.176/2020-2021

Tunlai hrileng darh chak tak Novel Coronavirus Disease, Covid-19 dona kawnga  hmalatu  hrang hrangte’n he hripui beihletna kawnga invenna thuam  Personal Protective Equipment (PPE) leh a dangte an  indaihlohnate  hria a, mamawh phuhruk anih theihna tura mi inphal leh thahnemngaite kaltlanga March Ni 27, 2020 a din, PPE  Volunteer Group Champhai chuan Covid-19 laka invenna hmanruate an sem chhuak mek zel.

Din anih atangin chak taka hmalak niin,  pawl member leh mi inphalte hnen atanga tanpuina tlingkhawm pawisafai leh thil siamna tur hmanrua atangin  Covid-19 dona kawnga tha thawhtu hrang hrangte himna tur hmanruate a theih ang anga siam tan a ni a. Sum neih ang ang te hmangin mamawh an lakkhawm a, Puanthui thiam mi tlawmngaite dap zelin mi 42 an rawn penchhuak thei a, a thui leh sem hnate a remchan dan ang zela kalpui thin a ni a. Mahni hmanraw intumte tan pawh a thlawnin an siam sak thin bawk a ni.

Tun thlenga khawtual kutchhuak ngei Covid-19 beihletna hmanraw hrang hrang  avaia sem chhuah tawh zat chu  Mask 1265,  PPE suit 205, Cotton suit 5  leh Cap 16  te a ni a. April Ni 3 thleng khan tanpuina sumfai Rs 31,600/-, Cotton ready made Belt 1, Elastic roll 1 leh  Hand Sanitizer litre 2 dawn a ni.

Vawiin April Ni 7, 2020 hian  PPE  Volunteer Group Champhai chuan Damdawiin hrang hrang, District Panchayat Resource Centre (DPRC) Quarantine Centre, Village Level Task Force-te, Police-te leh mamawhna hmunah te  Covid-19 laka invenna hmanruate an sem chhuak leh a ni.