1978/2024-2025

Aizawl 10th September, 2024: Performance Recognition for Access to Financial Inclusion and Street Vendors Empowerment (PRAISE) Award chu vawiin khan Vanapa Hall-ah Pu K. Sapdanga, UD&PA Minister chuan a sem.

Khuallian UD&PA Minister chuan a department enkawlin mi harsa zawkte, mi chhumchhiate chawikan leh dawmkan nana an hmalakna leh Bank (lending institution) te hmalakna te chu fakin lawmawm a tih thu a sawi a, theihtawpchhuah zel turin a fuih a. Loan kan lak hian kan pawisa emaw tih mai a awl hle a, chetsual a awl em em a ni. Loan hi hmang tangkai te tan chuan malsawmna hlawmhlak a ni a, hmang tangkai lo te tan erawh chhiatna a ni tih hrereng turin kalkawmte chu a chah. Loan chu Bank te'n min hawhtir mai a nih avangin kan eizawnna bul tan nan chauh hmang turin a chah bawk a ni.

Vawiina hetiang loan latute award dawng hial theia an awm chu a lawmpui thu sawiin kan sakhua kan hlamchhiah chuan hlawhtlinna pawh hi min tichhetu a ni thei tih hrereng chunga nun hmang turin a chah a. Khawvelah hian mi naran kan tam ber a, rinawm tak leh zahawm taka kan thawh phawt chuan kan eizawnna pawh hi a zahawm lohna a awm bik chuang lova. Kan thil zawrhte thianghlim ber, kan hnathawhna atanga haw tlai ber, dawr hawng hma ber, taima ber nih chunga rinawm taka kan thawh chuan hlawhchhamnain min kiansan dawn a ni a ti.

Minister hian Best Performing ULB - Aizawl Municipal Corporation, Best Performing Lending Institutions - Mizoram Rural Bank leh State Bank of India, Best Performing Bank Branches Award-ah Mizoram Rural Branch atangin Champhai Branch, Durtlang, Khatla, Saitual leh Vaivakawn Branch, State Bank of India atangin Aizawl Branch, Dawrpui Branch leh In Touch te hnenah PRAISE Award hi a hlan nghal bawk a ni.

Dr. Andrew H. Vanlaldika, Mission Director, DAY-NULM, UD&PA Department chuan PM-SVANidhi Scheme chungchang sawifiahna neiin PM- SVANidhi-in a tum ber chu COVID-19 Pandemic laia eizawnna khaihlak, street vendors (kawngsira dawrkai te) eizawnna siamsak niin pawisa pung tlem zawka lending institution atanga dawn theihna a ni a. Loan an lakah hian central sorkar chuan 7% a pung a rulhsak a ni. Kumin leh nikum India Republic Day hmanna-ah khan PM- SVANidhi beneficiary te chu India khawpui New Delhi-ah hruaithlak an nih thu a sawi.

PM-SVANidhi Scheme hi Mizoram-ah July 1, 2020 khan launch tan niin he scheme hian hamthatna hrang hrang pariat (8) a keng tel a. Beneficiary te chu digital payment system zirtir an nih bakah digital payment system hi an dawrah ruahmansak an ni. He Scheme hnuaiah hian 1st Loan cheng singkhat niin kum khat chhunga rulh zawh tur a ni a. 2nd Loan cheng sing hnih niin kum khat leh a chanve chhunga rulh zawk tur leh 3rd Loan, cheng singnga, kum 3 chhunga rulh zawh tur te a awm a. A pung tlem leh dahkham neih ngai lovin an la thei a ni. PM-SVANidhi Scheme hnuaiah Mizoram-ah 1st Loan, 2364 out of 4025 (59%), 2nd Loan, 381 out of 340 (112%) leh 3rd Loan, 102 out of 100 (102%) pek chhuah tawh a ni.

He hunah hian AMC Dy. Mayor Pu R. Thanglura, Mizoram Rural Bank leh SBI atangin thusawi ngaihthlak anih bakah Ministry of Housing and Urban Affairs, Government of India atangin National Mission Manager Pi Isha Trivedi hnen atanga thusawi ngaihthlak a ni bawk a. PM-SVANidhi applicants te hnenah Sanction letter semna hun hman nghal a ni bawk.

Vawiin vek hian PM-SVANidhi hnuaia loan chinchang hre duh tan Loan Camp siam niin Street Vendors loan chungchang inhrilh hriatna hun hman nghal a ni.

PRAISE Award semna hunah hian Pu Lalmalsawma Pachuau, IRS, Secretary, UD&PA chuan kalkhawmte lawmna thu sawiin Pu Andrew Lalhruaia, Project Director, DAY-NULM, UD&PA chuan hun tawp lawmthu sawina a nei a ni.