3663/2024-2025

Aizawl, the 24th December, 2024: India President Pi Droupadi Murmu chuan Thawhlehni tlai khan Mizoram Larsap ni turin Gen. (Dr) Vijay Kumar Singh, PVSM, AVSM, YSM (Retd.) chu a ruat.

Hetih rual hian Mizoram Larsap dinhmun chelh mektu Dr. Hari Babu Kambhampati chu Odisha Larsap atan India President chuan a ruat a; a ni hian Odisha Larsap atanga banna thehlut President-in a pawmsak tak Pu Raghubar Das chu a thlak thung dawn a ni.

Mizoram Larsap thar tur Gen. (Dr) Vijay Kumar Singh, PVSM, AVSM, YSM (Retd.) hi May 10, 1951a piang niin, India ram Chief of Army Staff 24-na a ni a, Indian Army atanga a chawlh hnuah Politics-ah a lut a, kum 2014 leh 2019 Lok Sabha Inthlanpuiahte khan BJP ticket-a dingin Ghaziabad, Uttar Pradesh atanga thlan tlin a ni a. Prime Minister Pu Narendra Modi kaihhruai term khatnaah khan Minister of State for External Affairs, Minister of State (Independent Charge) for DoNER leh Minister of State for Statistics and Programme Implementation-te a chelh a. A term hnihnaah khan Minister of State for Road Transport and Highways leh Civil Aviation-te a lo chelh tawh bawk.