Vawiin chawhnu khan Chief Secretary Conference Hall-ah Chief Secretary Pu Van Hela Pachuau hovin September ni 24, 2010 a Mizoram University Convocation rawn hmanpui tur India President Pi Pratibha Devisingh Patil rawn zin tur chungchanga inbuatsaihna te thlirletna neih a ni a, hemi rual hian naktuka rawn thleng tur ram hrang hrang Ambassador leh High Commissioner-te lo buaipui dan tura inbuatsaihna te thlirho a ni bawk.
President rawn zin tur chungchanga mawhphurhna latu chi hrang hrang ten an hmalakna leh an inbuatsaih dan te report an pe a, hengte hi sawihova uluk taka thlirlet anih hnuin Chief Secretary Pu Van Hela Pachuau chuan an inbuatsaihnate tha thawkhata a hriat thu leh an thawhrimna ah lungawithlak a tih thu a sawi a, President cham chhunga harsatna leh buaina awm lova tluang taka inbuatsaihnate tihhlawhtlin anih theih nan tha thlah lova tan la turin a chah nghal bawk a ni.
Puan tawh angin President hi September ni 23 ah Aizawl lo thlengin Raj Bhavanah a riak ang a, Raj Bhavanah hian Civic Reception neih anih bakah, Handloom, handicraft leh Flower Exhibition neih nghal a ni ang a, Larsap-in State Dinner a buatsaih bawk ang. Prwesident hian September ni 24 ah Mizoram University Convocation a hmanpui hnu in Aizawl a chhuahsan leh ang.
Hetih rual hian zan hnih riaka mizoram rawn tlawh tur Ram hrang hrang Ambassador leh High Commissioner te lo dawnsawn dan tur a ruahmanna te thlirlet nghal a ni a, inpuahchahna pawh tha taka kalpui anih thu report a ni. An zingah hian a tira ram hrang hrang 8 aiawh rawn kal tura tih chu Vietnam Ambassador-in a rawn thulh leh tak avangin ram 7 aiawh an rawn kal dawn a ni. Heng ram hrang hrang palai te hian naktuk September ni 21, 2010 hian Aizawl an rawn thleng ang a, tlai dar 4:30 ah Assembly Hall-ah Chief Minister hovin Speaker, Minister, Parliamentary Secretary leh MLA rualte nen meeting an nei ang a, zanah Chief Minister-in zanriah a buatsaih sak bawk ang, an cham chhungin Reiek, Zokhawthar leh hmun pawimawh thenkhat te an tlawh ang a, September ni 23 ah Mizoram an chhuahsan leh ang.
