Mizoram sorkar, Information & Public Relations department tirha Press mi 9, MJA Lunglei  District Hqrs. hruaitute chuan kar khat chhung Sikkim leh a chhehvel an fan hnuin dam takin Aizawl an lo thleng leh ta a. Nimin khan I&PR department Director Pu Jim K.Chozah-in anmahni puala thingpui a buatsaih in hovin Press mite hian an zinna chanchin report an pe a ni.

 

 

 

 

 

 

 

 

Lunglei MJA hruaitute chuan Press mite khawhawi tizau tur leh an inzir nana Mizoram sorkar-in Press tour a buatsaih sak thin chu lawmawm an tiin a bik takin Lunglei MJA ten tun tum Press Tour-a Sikkim an tlawh thei chu vannei an inti in Mizoram sorkar chungah lawmthu an sawi a. An zinna chu an hlawkpui thu leh thil thar tam tak an zir chhuah thu te, Sikkim sorkar leh a mipuite atanga entawn tur thahnem tak Mizoram-in a nei nia an hmuh thu te, Sikkim chu Mizoram aia ram intodelh leh kawng tam taka hma sawn zawk ni mah se, Press mite hmakhua atana sorkar hmalakna ah Sikkim chuan Mizoram sorkar atanga entawn tur nei ve thung hle nia an hriat thu te an sawi a. An cham chhunga Sikkim sorkar in duat taka a lo enkawl dan pawh lawmawm an tih thu an tarlang bawk a ni.

Press Tour-a kalte hi Sikkim sorkar I&PR department chuan lo mikhualin March 15&16 khan Sikkim khawpui chhung hmun hrang hrang an fanpui a. Sorkar hmasawnna hnathawh pawimawhte bakah ram hmasawnna kawnga mimal leh pawl hmalakna te pawh enpui an ni a. March 17 khan Gangtok khawpui atanga 52 Km.  a hla, India leh China ram inrina laia sipai hmun pawimawh, Nathula Military Post an tlawh bawk a ni. Press mite hian Darjeeling pawh tlawhin Kolkota-a Mizo Welfare Association ten Chapchar Kut an lawmna an telpui nghal bawk a ni.

Lunglei MJA hruaitute hi President Pu K.Lalrinpuia; Vice President Pu Lalrintluanga Khiangte; General Secretary Pu K.Lalrochana; Fin.Secretary Pu Lalrinchhana; Information Secretary Pu F.Lalngaihzuala leh Executive Members Pu H.Lalthansanga, Pu Lianchama Changte, Pu F.C. Dinpuia leh Pu  R.Thanghmingliana te an ni a. Lunglei MJA hruaitute chuan Press Tour-a an kal theihna tura kawng engkima hmalak saktu IPR Minister bakah IPR Director leh a thawhpui zawng  zawngte chungah lawmthu an sawi a. Kolkata-a a tul ang ang lo buaipuitu Liaison Officer leh Assistant Liaison Officer-te chungah lawmthu an sawi bawk a ni. Press mite hi Pi P.B.Lianthangpuii IPRO chuan a hruai a ni.