No.7816/2020-2021 

Aizawl, the 17th March 2021 : Vawiin khan Prime Minister Pu Narendra Modi, Home Minister Pu Amit Shah, State hrang hrang Chief Minister te leh UT Administrator ten ram puma COVID-19 dinhmun leh hri danna (vaccination) kalpui dan chungchang te video conferencing kaltlangin an thlirho a. Chief Minister aiawhin he video conferencing ah hian Health Minister Dr. R. Lalthangliana a tel a, Mizoram dinhmun leh vaccine mamawh belh chungchang a thlen a ni. 

Prime Minister Pu Narendra Modi chuan vaccine pek leh inkuahkhirhna te a ruala kalpui a ni a, vaccination avangin mipuite inthlahdah thei kan ni lova, inkaihhruaina hrang hrang Sawrkarin a duan te uluk taka zawm leh ngaih pawimawh reng a la tul thu a sawi a. Heng hi uluk taka mipuite kan hrilh leh kan zirtir reng hi a la ngai a ni, a ti. Sample test chungchang sawiin Prime Minister chuan state thenkhat ten RAgT an hmang tam niin a lang a, RT-PCR test tam thei ang ber tih hi duhthusam a ni, a ti a. District Level a hripui do nan micro containment zone ngaihpawimawh a tul thu te, vaccination centre tihpun a tul thu te sawiin vaccine tihriral (wastage) tam ni a lang chu a veiawm tiin, hei hi uluk taka vil leh enzui a pawimawh hle a ti.  Prime Minister chuan India ramin hripui dona kawnga hma a lak dante leh khawvel huapa vaccination lian ber nia ngaih, COVID-19 vaccination a kalpui danah khawvel huapin fak leh ngaihven a hlawh thu te a sawilang bawk a ni. 

Home Minister Pu Amit Shah chuan Central Sawrkar leh State Sawrkar te thawhhona a that avangin COVID-19 hripui dona kawngah hlawhtlinna engemaw chen a awm hnuin tunhnai thla khat kalta mai atanga state 6-a COVID-19 case thar pung chho mek chu a ngaihtuahawm tih thu a sawi a. September 2020 ah chawhrualin ram pumah case thar 90000 chuang hmuh a ni a, chu chu February 2021 ah case 9000 ah a tlahniam a mahse tunhnaiah nitin case 24500 vel hmuh a ni a, heng case zinga a tam ber chu state 6 atangin a ni a, he thil hi  ngaihtuah ngai tak leh, a dona kawngah hmalakna tihchak lehzual a tul dawn tiin a sawi. Hripui dona kawngah tha thlah thei kan ni lova, contact tracing te, test tam zawk tih te leh inkhunghran (isolation) lamah tan lak a tul reng tih a sawi bawk. 

Union Health Secretary Pu Rajesh Bhushan chuan COVID-19 case thar punna state thenkhat dinhmun te tarlangin vaccination kalpui dan leh hemi chungchanga duhkhawp lohna te a sawi a. State 6 - Maharastra, Madhya Pradesh, Punjab, Karnataka, Gujarat, Haryana leh Chandigarh UT, tunhnaia COVID-19 punna state te Chief Minister ten an dinhmun sawiin hma an lak dan te an sawi tel a ni. 

Chief Minister aiawha he video conferencing a tel Health Minister Dr. R Lalthangliana chuan Mizoram dinhmun te leh COVID-19 vaccine pek dan dinhmun tlangpui leh vaccine mamawh belh a nih thu he meeting ah hian a thlen a. Hripui dona kawnga Mizoram a hlawhtlin dan leh a chhan hrang hrang te a tarlang bawk a ni. 

Nimin thleng khan khan ram pumah COVID-19 case nuai 114 chuang hmuhchhuah tawh niin, chung zinga nuai 2.34 hi hri vei mek an ni a. Hripui avanga boral mihring nuai 1.59 awm tawhin sample test tawh zawng zawng zat hi vaibelchhe 23 chuang a ni tawh a. Mihring vaibelchhe 3 leh nuai 51 hnenah COVID-19 vaccine pek an ni tawh a, heng zinga vaibelchhe 1 leh nuai 38 chu kum upa lam leh natna benvawn neite an ni. Khawvel pumah USA tih lohah chuan vaccine pek tamna ber ram chu India a ni. 

Positivity Rate (test zawng zawng atanga positive case awm zat percentage) ram pumah 4.99 % anih laiin Mizoram rate chu 1.82 % a ni a. Recovery Rate (natna kai damchhuak percentage) chu ram pumah 96.54 %  anih laiin Mizoram Recovery Rate chu 99.44 % a  ni a. Mortality Rate (natna avanga boral) ram pumah 1.39 % anih laiin Mizoram Mortality Rate chu 0.22 % a ni. 

Vawiin meeting-ah hian kumin March ni 1 leh March ni 15 inkar hian State 12 a District 70 ah hri punna hi za zelah 150 a nih thu te,  150% atanga 100% a pun belhna District 55 a  awm thu leh hri punna za zelah 50 leh 100 inkar District 77 lai a awm thu te tarlan niin  heng District ah hian a bika hma lak a tul thu te sawilan a ni.