Mizoram rawn tlawhtu Dr.Jitendra Singh, Union Minister of State(independent Charge), Ministry of Development of North Eastern Region(DoNER) chuan State Guest House Conference Hall-ah DoNER Ministry hnuaia hnathawk Department hrang hrang hotulu te a kawmnaah India hmarchhak states tih hmasawn chu Prime Minister Pu Narendra Modi in a ngaih pawimawh ber zinga mi a ni a tiin North East States hmasawn nan DoNER in theihtawp a chhuah tur thu a sawi.
Official te nen an inkawm hma hian Speaker Pu Hiphei in DoNER Minister hi kawmin Mizoram in a mamawh te a sawi pui a. Official Meeting ah hian Mizoram sawrkar aiawhin Chief Secretary Pu Lalmalsawma'n Mizoram mamawh zual deuh te leh harsatna lian tham chinfel hmasak ngai te Union Minister hi hrilh a. Meeting neih zawh ah chanchinbumite'n DoNER Minister hi an kawm leh nghal ani.
DoNER Minister Dr.Jitendra Singh chuan Mizoram in inkalpawhna tha zawk a mamawh nia a hriat thu sawiin Delhi leh Aizawl inkar Direct Flight a awm ve theih nan Airline Company te lo bia in hmalak anih tur thu a sawi a. Lengpui Airport chungchanga Airport Authority of India(AAI) leh Mizoram sawrkar inkara harsatna awm te pawh Chief Minister Pu Lal Thanhawla nen an inkawmna ah an sawi dun thu leh a theihna zawna hmalak a lo tum thu a sawi a. Hmarchhak states ten DoNER dawr in Delhi an pan thin a, tunah chuan DoNER pawh in Hmarchhak states harsatnate sutkianpui turin a rawn pan ve fo tawh zawk dawn a ni tiin a kaihhruai ministry inhawn thu a sawi a ni. Prime Minister duhdan in Union Minister 8 te chuan North East states chawlhkar hnih danah an tlawh ziah dawn a, chumi kal zelah Union Minister pakhat in Mizoram pawh May thla chhungin a rawn tlawh leh dawn a ni a ti a. Heng mi pawimawh rawn kal hun hi State sawrkar leh official te pawhin remchanna ah lak thiam a tha khawp ang a ti.
Thusawitu dang, Pu A.M. Singh, Joint Secretary, DoNER chuan State Department hrang hrang DoNER nena hnathawk thin te chu Information Technology hmang tangkai tur leh an MIS leh DPR te pawh DPR software hmanga siam turin a chah a. Nasa zawka Internet leh E-mail hmang a DoNER dawr chu a awlsam zawk tur thu a sawi a ni.
Press Conference neih neih a nih hnu hian ama puala buatsaih Cultural Programme ah Dr. Jitendra Singh hi Planning Minister Pu Lalsawta'n a lo mikhual in zanriah a buatsaih sak nghal a ni. Cultural programme ah hian Mizo hnamlam chi hrang hrang entir niin Home Minister Pu R.Lalzirliana, School Education Minister Pu H.Rohluna, Parliamentary Secretary Lt.Col. Z.S. Zuala, Parliamentary Secretary Pu Hmingdailova Khiangte, Parliamentary Secretary Pu Joseph Lalhimpuia, ZIDCO Chairman Pu Lalrobiaka, MLA, Pu Lalruatkima, MLA leh Pu H.Liansailova, Vice Chairman, State Planning Board bakah sawrkar mi pawimawh te pawh he hunah hian an tel a ni.
