701/2022-2023
India ramin zalenna a neih lawmna “Azadi Ka Amrit Mahotsav” chu kalpui mek zel a ni a. He hun ropui tak denchhen hian Prime Minister zahawm tak chuan Ministry/Department hrang hrang pakua hnuaia scheme/programme thlan chhuah sawmparuk a beneficiary te biangbiakna hun a hmang dawn a ni. Heng scheme hlawkpuitu (beneficiary) te hi vaibelchhe chuang an ni.Heng scheme thlan chhuahte hian miretheite chawikan a tum ber a. Chuvangin, he hun pawh hi “Garib Kalyan Sammelan” (Mirethei chawikanna inkhawmpui) tiin vuah a ni nghe nghe a ni. Heng scheme ten India mipuite tana nun nuam leh awlsam zawk a thlen dan piah lamah, tanho dan leh mi tam zawk hnena kalpui a nih theih dan tur ngaihtuah chu he Inkhawmpuiin a tum a ni.
He inkhawmpui hi rampum huapa intawhkhawmna lian ber zinga mi a ni dawn a. India rama District zawng zawngte an tel dawn a ni. Prime Minister zahawm tak chuan beneficiary te chu heng scheme thlanchhuah ten an chenna in, tui, eitur, hriselna leh chawtha, nitin nunphung leh sumpai leh a dangte a hmasawnna a thlensak dan te a sawipui dawn a ni. Heng scheme/programme thlanchhuahte chu:
i) Pradhan Mantri AwaasYojana (both Grameen & Urban)
ii) Pradhan Mantri Kisan Samman Nidhi
iii) Pradhan Mantri Ujjwala Yojana
iv) POSHAN Abhiyan
v) Pradhan Mantri Matru Vandana Yojana
vi) Swachh Bharat Mission (both Grameen & Urban)
vii) Jal Jeevan Mission & AMRUT
viii) Pradhan Mantri SVANidhi Scheme
ix) One Nation One Ration Card
x) Pradhan Mantri Garib Kalyan Anna Yojana
xi) Ayushman Bharat PM Jan ArogyaYojana
xii) Ayushman Bharat Health and Wellness Centre
xiii) Pradhan Mantri MUDRA Yojana
Kolasib District pawhin he hun pawimawh takah hian chawhma dar 9:45 hian I&PR Conference Hall-ah programme hmang turin ruahmanna a siam a. He hunah hian Addl. Deputy Commissioner, Pu Lallawmawma chuan kaihruaiin Deputy Commissioner Pu John LT Sanga chuan thu a sawi dawn a, Department thlan bik atangin thusawi tawi ngaihthlak a ni bawk ang. District Level programme hian chawhma dar 11:00 atangin Shimla-a Prime Minister zahawm takin beneficiary te a kawmlai, live a pekchhuah chu a zawm ve dawn bawk a ni.
National Level a inkhawmpui (Sammelan) hi Shimla ah ni 31.05.2022 ah hman tur a ni a, Prime Minister zahawm takin beneficiary te hmaichhanah a kawm dawn a ni. PM hian Kisan Samman Nidhi installment 11 na a tlangzarh bawk ang. Tin, video conference hmangin Prime Minister hian ram chhung hmun hrang hranga beneficiary te biangbiakna hun a hmang dawn bawk a ni.
National Level inkhawmpui hi Doordarshan chuan a National leh Regional channel te katlangin live in a pechhuak dawn a. MyGov kaltlangin in register te tan webcast a pekchhuah a ni bawk ang. Heng bakah hian social media channel hrang hrang heng Youtube, Facebook, Twitter, Instagram etc. kaltlangin he programme hi a chhim theih dawn a ni. He inkhawmpui hian scheme thlan chhuahten mipui an ngaihpawimawhzia leh an nuna hmasawnna a thlen dan tarlan bakah, khua leh tui ten Sawrkar laka beiseina an neihte pawh a tarlan beisei a ni a. India ramin hmasawnna kawng a zawh mekah hian tumah kal san ni lo se tih phochhuah chu a tum ber a ni.
