No.1808/2021-2022

Aizawl 12th August 2021: Vawiin khan Aizawl South-III Bialtu MLA Prof.F.Lalnunmawia chuan a bial chhung Sialsuk PHC-a damlo phurhna tur Ambulance chu Health & Family Welfare Department hnenah a pe.

Prof. F.Lalnunmawia, MLA chuan Ambulance inhlanna hun tawi Directorate of Health Services, Dinthar Office kawta neihah thusawiin a bial chhunga Sialsuk PHC ten ambulance an neih hi a hlui tawh avangin a tlan hleithei tawh lo va. Covid-19 hri len lai a nih avangin Ambulance mamawhna a san em avangin Ambulance thar hi Sialsuk leh a chhehvel khua ten tangkai taka an hman a beisei, tih a sawi a. “Lockdown avangin Permit kan tifel lawk thei lo va, H&FW Dept leh Transport Dept ten min tih fel sak ta hi an chungah pawh  lawmthu kan sawi a ni" a ti bawk

Prof.F.Lalnunmawia MLA chuan Health Department chu mipui hriselna atana hnathawktu pawimawh tak an nih avangin MLA a nihna zawnah pawh an hmalakna thlawp leh tawiawm bakah, tanpui an ngaihna kawnga anmahni tanpui theia a awm chu lawmawm a tih thu a sawi a.  A bial chhung Sialsuk PHC ngei pawh sak that leh tihchangtlun a ni chho mek chu lawmawm a tih thu sawiin Ambulance chu a bial mipui, damlohna avanga harsatna tawk ten tangkai taka an hman a duh thu a sawi bawk.

Prof. F.Lalnunmawia MLA chuan Ambulance Document leh chabi te Dr.F.Lallianhlira, Principal Director H&FW hnenah a hlan nghal a. Ambulance Registration pawh Health Department lamin an buaipui chho nghal dawn a ni.

Dr. F.Lallianhlira, Principal Director  chuan Health Department hmalakna thlawptu leh a bialte a ngaih pawimawh avanga MLA zahawm takin a bial mipuite hman tur Ambulance Health Department hnena a rawn pe chu ropui a tih thu sawiin Health Department tana thil chhinchhiah tlak a ni reng tawh dawn a ni, a ti.  

Ambulance hi Rs. 5,68,792 senga lei a ni a. Vawiina Ambulance hlanna hun hi Director Health Services leh Health Officials, Sialsuk PHC MO, Sialsuk Welfare (Aizawl),  Hmuifangtlang Group YMA leh MNF Block hruaitute'n an hman pui a ni.