1955/2025-2026

Dated Aizawl, the 17th October, 2025: Rural Development & Administration Minister Prof. Lalnilawma hovin nimin, October ni 16, 2025 leh vawiin khan a office-ah Mizoram hmun hrang hranga District Rural Development Office leh Rural Development Block Office-a thawktute nen ni 100 inhlawhna (MGNREGA) chungchangah inrawnkhawmna neih a ni.

Minister Prof. Lalnilawma chuan MGNREGA sum hmanga hnathawhte chu thingtlang mipuite tana rotling leh chhenfakawm a nih theih nan RD&A Dept a thawktuten ruahmanna tha zawk an neih a tul tih sawiin, hna tha taka thawh a nih theih nan tun aia nasa lehzuala inpe turin a fuih a. An hnathawh leh ruahmanna siamte chu a bikin kuthnathawktute tana malsawmna a nih theih nan theihtawp chhuah a tul tih a sawi a ni.

He hunah hian Rural Development Block Office-a thawktute’n mipuite thatna tura an hna duante, he presentation hi Video Conference Virtual Mode leh physical mode hmangin presentation an nei a. RD&A Minister Prof. Lalnilawma hi Pu R. Zarzosanga, Commissioner & Secretary leh RD official dangte’n an tawiawm a ni.