Vawiin khan Ruihhlo kaihhnawih leh HIV chungchanga kum 5 chhung hmalakna tur Project Sunrise chu Pu Lal Thanzara Health Minister chuan I & PR Conference Hall ah a hawng. Health Department leh MSACs te buatsaih in Orientation of PWID TIS & Health Officials of Aizawl District hman nghal a ni bawk .Project Sunrise hi tun thla vek ni 6 khan Union Health Minister in Imphal,Manipur ah ram pum huap in a lo hawng tawh a ni.He hunah hian Health Department a Doctor leh Officer pawimawh te, MSACs lama thawktu pawimawh te bakah NGO leh kohhran hruaitu pawimawh te an tel tha hle.

Kan State in Project Sunrise kan nei thei chu lawmawm a tih thu Khuallian Pu Lal Thanzara chuan a sawi rual in Health Department thawktu te leh department hrang hrang bakah Media,Kohhran leh khawtlang hruaitu te thawhhona pawimawh zia te Project Sunrise hmalakna chu hlawk thei ang bera chhawr tangkai tur leh,Project a lo tawp ta anih pawh a hna tha chhunzawm zel thei tura rilru leh ngaihtuahna tun atanga lo seng lawk turin kal khawm te chu a chah a. Mizorama HIV dona kawnga hmalakna hrang hrang te sawifiah in Kum 1999 atang daih tawh khan Health Deptt. hnuaia MSACS kaltlangin HIV kai thei dinhmuna dingte enkawlna kawnga hmalakna kalpui tawh dan leh tunah phei chuan District tina inzar pharh in HIV darh zel tur vennna kawngah chak taka hmalak a nih dan te, nundan phung avanga HIV kai awlsamte zinga hmalakna Harm Reduction Strategy hrang hrang - Needle Syringe Exchange Programme, OST leh Condom Promotion te hi dodaltu nil ova, hrethiama, thlawp tlattu kan nih a pawimawhzia a sawi a, heng mite himna hi kan zavaia himna a nih zia leh,thangthar lo la awm zel turte tan pawh HIV laka himna kawng pawimawh tak a nih zia a sawi bawk a ni.

HIV leh ruih theih hrang hrang dona kawngah thawktu department te bakah NGO, Kohhran leh khawtlang hruaitute tan lak leh zual a tul thu sawiin Health Minister chuan tun aia nasa hian NGO leh Kohhran te pawh hian hemi chungchang hi sawi darh se, kan ram dinhmun leh thalai tam takte nun kawng chhiat phahna a nih thu nasa taka puanzar ni theise a duhthu sawiin MLA zawng zawngte pawh hian mahni bial theuhah hma lain awareness lamah tan lak ni theise a duhthu a sawi bawk.

Project Sunrise hawnna inkhawm kaihruaitu Dr.Lalbiakkima, Director, DHME chuan HIV hi MSACS leh Health department te buaipui tura dah mai lova, mitin mawhphurhna ani tih hre theuh turin ngenna thu a sawi a. Dr. Lalmalsawmi Sailo, Project Director, MSACS chuan Project Sunrise chungchang sawifiahin kum nga chhunga hmalak dan tur tlangpuia sawifiah a. Project Sunrise kalpuitu ber chu Family Health International (FHI 360) a ni a, hmarchhak state 8 ah National AIDS Control Organization (NACO) leh State tin AIDS Control Society te thawhpuiin hma a la tan mek a, Project Sunrise hmalakna atana sum tumtu ber chu Centre for Disease Control (CDC) a nih thu a sawi.

Pu Robert Lalrempuia Khiangte, State Coordinator, Project Sunrise, FHI 360 chuan lawmthu sawina hun a hman zawhah chawhma lam programme chu zawh a ni a, chawhnu lamah Orientation of PWID TIs (People Who Inject-Drugs Targetted Interventions) chungchang zirhona neih leh nghal a ni.