No.4339/2021-2022
Aizawl 21st March, 2022 : Pu C. Lalrinsanga, Hon'ble Minister, Agriculture, Irrigation & Water Resources, Cooperation chuan vawiin khan Training Hall, KVK, Lengpuiah Krishi Vigyan Kendra (KVK) Lengpui buatsaih Chinese Carp Hatchery Programme chu khuallian niin a hawng.

Khuallian chuan KVK hmalakna-a Chinese Carb hawn theih a ni chu lawmawm a tih thu sawiin ecological balance, sik leh sa tichhe lova hmasawnna kalpui zel turin KVK thawktute a chah a. Chinese mithiamte pawh vawikhata hlawhtlinna hmu nghal an ni biklo tih hria-in beidawng lo a taima taka inzir tura chahin, thiamna sang zawk hmanga farmers te dawmkan an ni tur chu a lawmawm hle a, hmasawn zel tura chahin, District thar hawnah pawh KVK pathum din belh turin Sorkar chuan hma a la mek a, Scientific approach hmanga kan loneimite chawikan chu kan sorkar pawhin a tum ber a nih avangin theihtawpchhuaha hmalakna kalpui turin a chah.

KVK Lengpui thawktute chu a tha ber nih tum tura chahin, remhriatna, finna leh kan thiamna chu loneimite hnenah pechhuak leh thin turin a chah a, Mithiam zawkte zirtirna atanga farmers te'n hma an lak chuan hlawhtlinna leh hlawkna kan hmuh ngei a beisei thu a sawi bawk.

Minister hian KVK Office leh Laboratory te a enfiah nghal bawk.

Pu Rualthantluanga Pachuau, SMS (Fisheries), KVK Mamit District chuan Technical Report pein Chinese Carp Hatchery chu Incubation pool (tui keutirna) siam niin vawikhatah nuai 20 vel a keutir theih dawn a. Nursery pool awm lehin sangha ni 40 - 50 dah lenna hmun siam a ni a. Spawning pool (tui tirna hmun) tui tivir a, ruahsur lem siam theihna tur a ni a, vawikhatah sangha tui nuai 40 dawn theihna tura duan a ni bawk. He hatchery-ah hian Indian major carp leh exotic major carb sangha note tuitir a, keutir tum a nih thu a sawi.

He hun hi Dr. Vanlalhruaia Hnamte, Senior Scientist & Head, KVK Mamit District-in kaihruaiin Dr. Rebecca Lalmuanpuii, SMS (Agro-forestry), KVK Mamit District chuan lawmthu a sawi a ni.

Minister hi Er. H. Lalzirliana, MLA, Vice Chairman, Road & Infrastructure Development Board, Pu James Lalsiamliana, Director, Agriculture Department, Pu F. Lalmalsawma, Deputy Director (KVK), Directorate of Agriculture, Commr. Lalkiamlova, Member, Agriculture Development Board bakah Officials dangte'n an tawiawm a ni.