No.4003/2020-2021

Dated Serchhip, the 11th August, 2020: Vawiin hian Serchhip District Consultative Committee/District Level Review Committee & District Level Security Committee on Bank te chu an Chairman Pu Kumar Abhishek, Serchhip Bawrhsap hovin DC Meeting Room ah an thukhawm a, Pu C. Lalrosanga, MP Lok Sabha chuan a tel pui.

Thuhma sawiin Pu C. Lalrosanga chuan, Covid19 hripui avangin mi tam takin an eizawnna hna an chana, state pawn atangin mi tam tak an rawn haw a, hun pangaia bungrua leh hmanrua tluang taka kan hmuh thinte kan hmu tha tawk lo bawk a. Ei leh bar zawn kawngah nasa takin min nghawng a ni. Covid19 vanga hna chan leh eizawnna lama harsatna tawkte chhanchhuah an nih theih nan Bank ten thil tam tak in tihtheih avangin vawiinah thahnem ngai taka thawk turin ka ngen thar cheu a, sawrkar laipui pawhin hei hi a ngai pawimawh hle a, Ministry of Micro, Small & Medium Enterprises (MSME) kaihhnawih ruahmanna thar engemawzat a siam phah a ni, tiin Serchhip District a Bank te hnathawh dan thlir hona hmuna a rawn tel chhan a sawi a ni.

Pu Kumar Abhishek pawhin thusawiin, Banking lama hmasawnna tur kan la neih, inzar zau chungchang te, Financial Literacy Campaign lam te leh Bank hote himna (security) lam thil te chu tunhma aia ngai pawhmawh zual turin a ngen a. Mizoram chu lehkhathiam tamna state anih avangin online banking lam uar deuh deuh tura inzirtir a that a rin thu a sawi a ni.

He hunah hian Member Secretary Pi Lalnilawmi, Chief Manager (Lead Bank) kaihhruaina in District chhunga Bank hrang hrang te kumin March thla thlenga hmasawnna an neihte thlirlet a ni a, 30th March, 2020 ah Credit Deposit Ratio (Bank a sum deposit atanga an puk chhuah tir zat ratio) chu 42.24% a ni a, Annual Credit Plan hnuaia loan puk tir zat chu 39.60% a ni. Annual Credit Plan hnuaia puk chhuah tirte hi eizawnna Agriculture, Industry leh Services Sector lama hmasawnna tura sum puk chhuah tir a ni. KCC loan hi FInancial Year 2019-20 ah mi 129 pek an ni a, a pawisa pekchhuah zat hi Rs. 122.14 Lakhs a ni. Serchhip District a KCC Loan pek tawh zawng zawng zat chu mi 1349 niin a sumin Rs. 928.79 Lakh a ni. District chhunga Bank Branch awm lohna khuaah Business Correspondents te dah an ni hlawm a, Indian Postal Payment Bank (IPPB) te pawh hman an ni bawk.

Heng bakah hian Bank kaltlanga sawrkar laipui schemes hrang hrang kalpui mek din hmun te, mipuite leh Bank inkara harsatna awm thei te sawi hova, hmalak zel dan turte ngaihtuah ho a ni.

Meeting ah hian Pu R. Sathyiasundaram, IPS, SP Serchhip, Pi C. Lalduhzuali, SDO Sadar, Pu Vishal Sah, IAS Probation bakah district chhunga bank managers te, NABARD aiawh te, RSETI aiawhte, District Officers pawimawhte an tel a ni.