Tunlai hian Lawngtlai West bialtu Minister Pu C. Ngunlianchunga chuan a bial chhung khaw hrang hrang fanna a nei mek.
Minister hian khaw hrang hranga hmasawnna hnathawh mek leh thawh mai tura ruahmanna kalpui te a hmunah a en hlawm a, khaw hrang hrangah mipui ten an lo lawm hle. Pu C.Ngunlianchunga chuan Bolisora leh Chhotaguisury in kalpawhna tura lei dawh tur, Backward Region Grant Fund (BRGF) atanga cheng nuaih sawmhnih senga siam tur chu nimin January ni 8 khan a en a, mipui ten a rang thei ang bera an chhawr theih nana hna tan thuai turin Contractor chu hrilhin sen belh ngai a awm anih pawhin hma lakpui a inhuam thu a sawi.
Minister hian BRGF atanga Damlui khaw panna tura lei dawh leh Fangfarlui panna tura lei dawh zawh thar pawh a hmunah kalin a en nghal. Fangfarlui phei hi chu motor la luh ngailohna khua niin lei an dawh atangin an khuaah motor a lut thei ta chauhva; khaw nawtin Lei-ah hian Minister hi an lo hmuak nghe nghe ani. Minister chuan heng thingtlang khaw chengker tak taka motor a lut thei ta chu lawmawm a tih thu sawiin sawrkar hian chak takin hmasawnna ke a chhep zel a ni a ti.
