Tukin zing khan T. Romana College building te, AH & Vety Complex, Republic Veng leh helai bul hnai leimin te Pu C. Ngunlianchunga, Disaster Management & Rehabilitation Minister chuan tlawhin a fangkual a, Bialtu MLA Pu R. Vanlalvena leh helai chheh vel Local Council member ten an tawiawm a ni.

Venghlui peng Pi Pangi dawr bul leh T. Romana College bul vel a motor chet velna chep lutuk te enho nghal a ni a. T. Romana College Principal Dr. Lalrintluanga leh a thawhpui te chuan Pu C. Ngunlianchunga chu an college hmunhma te an enkual pui nghal bawk. Zirlai lo pung zelah an hmun chu a chep tawh avangin hmun dang ngaihtuah a tul thu leh chumi atan chuan an college bul mai AH & Vety ram te chu sahthlak a remchang thei ang em tih te an lo sawi pui a. Hemi chungchang hi sawiho zui nghal a ni.

T. Romana College dinhmun chu a hriatthiam pui thu leh zirlai naupang te tan pawh harsatna hrang hrang an hmachhawn te a hriatthiam pui thu sawi in Minister chuan College ram zauhna a tana an hmalak na chu awm a tihpui laiin chu ti maia thu tih tluk theih loh a niin hei hi chu la zir chian a, sorkar lam hotute nena la ngaihtuah leh sawiho chi anih thu a sawi a. Hmalakna leh bawhzuina te chu a theih anga lo enpui a tum thu a sawi.

Republic Venga AH & Vety ram leh hmunhmate tlawh kualna ah hian T. Romana College hotute leh AH & Vety Department lama officer te bakah khawtlang hruaitute an tel a ni.